धितोपत्र बोर्डको अध्यक्ष छनौटको पुरानै प्रक्रिया ब्यूँताइयो, अनुपस्थित ३ जनालाई प्रस्तुतीकरणमा बोलाइयो

काठमाण्डौ । नेपाल धितोपत्र बोर्डको रिक्त अध्यक्ष पदका लागि स्थगित पुरानो प्रक्रियालाई नै निरन्तरता दिइएको छ । सोही बमोजिम व्यवसायिक कार्ययोजनाको प्रस्तुतीकरण र अन्तरवार्तामा छुटेका तीनजना उम्मेद्वारहरुको नाममा पुनः सूचना प्रकाशित गरिएको छ ।  

अर्थमन्त्रालयले गठन गरेको नेपाल धितोपत्र बोर्डको अध्यक्ष नियुक्ति प्रयोजनका लागि नाम सिफारिस गर्नका लागि गठन भएको सिफारिस समितिले बिहीबार एक सूचना प्रकाशित गर्दै आवेदकमध्ये सर्टलिस्टमा परेका ५ जनामध्ये पनि प्रस्तुतीकरण र अन्तर्वार्ता बहिस्कार गरेका तीनजनालाई पुनः असोज १८ बोलाइएको हो । 

कृष्णबहादुर कार्की, डा. चिरञ्जिवी चापागाईं र डा. नवराज अधिकारीलाई प्रस्तुतीकरण र अन्तर्वार्ताका लागि आगामी असोज १८ गते बिहान ८ बजे अर्थमन्त्रालयमा उपस्थित हुन सूचना जारी गरिएको छ । यी तीनैजना माओवादी निकटका हुन्।  

यसअघि माओवादी नेतृत्वको सरकारको पालामा नै धितोपत्र बोर्डको अध्यक्ष छनौटको प्रक्रिया सुरु भएको थियो । आवेदकमध्ये सर्टलिस्टमा सन्तोषनारायण श्रेष्ठ, मुक्ति श्रेष्ठ, डा. नवराज अधिकारी, कृष्णबहादुर कार्की र डा. चिरञ्जिवी चापागाईंको नाम परेको थियो । बोर्ड अध्यक्ष नियुक्तिको अन्तिम चरणमा तत्कालीन सत्ता साझेदार दल एमालेले बखेडा सिर्जना गरेको थियो । बोर्डको अध्यक्ष आफ्नो भागमा पर्नुपर्ने भन्दै एमाले अध्यक्ष केपी ओलीले प्रचण्डसम्मलाई मिलाएर तत्कालीन अर्थमन्त्री वर्षमान पुनमाथि दवाब सिर्जना गरेका थिए । ओली र प्रचण्डको मिलेमतोमा आएको दवाबलाई छल्न पुनले आफू निकटका अध्यक्षका तीन उम्मेद्वारलाई प्रस्तुतीकरण र अन्तर्वार्तामा उपस्थित नहुन उर्दी गरी भगाएका थिए । सोहीअनुसार मुक्ति श्रेष्ठ र सन्तोषनारायण श्रेष्ठ मात्र अन्तर्वार्तामा उपस्थित भएका थिए ।  

धितोपत्र बोर्डको नियुक्ति प्रक्रियाअनुसार सिफारिस समितिले उम्मेद्वारमध्ये ३ जनाको नाम सिफारिस गर्नैपर्ने बाध्यकारी व्यवस्था भएका कारण २ जनाको मात्र प्रस्तुतीकरण र अन्तर्वार्ताले सो प्रक्रिया स्थगित हुन पुगेको थियो ।  

माओवादी नेतृत्वको सरकार ढलेपछि र एमाले नेतृत्वको गठबन्धन सरकार गठन भएपछि अर्थमन्त्रालय एमालेले हाँकिरहेको छ । एमालेले आफू निकटका उम्मेद्वारहरुलाई नै अध्यक्ष बनाउने योजनाअनुसार धितोपत्र बोर्डको अध्यक्ष नियुक्तिको नयाँ प्रक्रिया सुरु गर्नतिर नलागी पुरानै प्रक्रियालाई अगाडि बढाउन खोजेको हो ।  

स्रोतका अनुसार एमालेले सन्तोषनारायण श्रेष्ठ र मुक्ति श्रेष्ठमध्ये एकजनालाई धितोपत्र बोर्डको अध्यक्ष बनाउने योजना बनाएको छ ।  

माओवादी नेतृत्वको सरकार भएकै बेला पनि एमाले अध्यक्ष ओली लगायतमाथि बोर्ड अध्यक्ष नियुक्तिमा आफ्ना मान्छे ल्याउने शर्तमा भट्ट समूहबाट ठूलो रकम नजराना बुझेको गम्भीर आरोप लागेको थियो । सो आरोपका विषयमा एमाले उच्च नेतृत्वबाट अझैसम्म पनि प्रष्टीकरण आएको छैन । 

पछिल्लो छनौट प्रक्रियामा तत्कालीन प्रधानमन्त्री पुष्पकमल दाहाल प्रचण्डकी स्वकीय सचिव तथा पुत्री गंगा दाहालले समेत निकै ठूलो नजराना बुझेको चर्चा चलेको थियो । धितोपत्र बोर्डको अध्यक्ष बन्नैका लागि ४० करोडमाथि बढी खर्च गर्न विभिन्न समय तयार भएका समाचारहरु पनि प्रकाशित भएका थिए । तर, यस्ता विषयमा कुनै पनि पक्षले प्रष्टीकरण नदिएको अवस्थामा तीव्र विवादमा परेको पुरानो प्रक्रियालाई नै ब्यूँताउने खेल हुनुलाई कतिपयले रहस्यमय र अर्थपूर्ण भनेका छन् ।  

माओवादी निकटका एक उम्मेद्वारका अनुसार यसअघि पनि तीनजनाले अन्तरवार्ता र प्रस्तुतीकरण बहिस्कार गर्नु पछाडिको कारण केपी ओली मात्र थिएनन् । 'वर्षमान पुनले गंगा दाहालले चलखेल गरेको सूइँको पाएपछि यो खेल खेलाएका थिए ।' एक उम्मेद्वारले भने-'उनकै डिजाइनमा तीन उम्मेद्वार एकाएक मोवाइल स्वीच अफ गरेर केही दिन बेपत्ता भएका थिए । पछि पटक पटक बोलाउँदा पनि गएनन् । यो सबै प्रचण्डलाई समेत देखाइदिने योजनाअनुसार खेल भएको थियो, जसमा पुन सफल भए ।'  

धितोपत्र बोर्डका तत्कालीन अध्यक्ष रमेशकुमार हमालको कार्यकाल सकिएपछि लामो समयदेखि अध्यक्षविहीन अवस्थामा छ । अध्यक्ष नहुँदा आईपीओ, हकप्रद निश्कासन प्रक्रिया प्रभावित भएको छ । बोर्डको नियमनकारी क्षमता समेत इतिहासकै कमजोर अवस्थामा पुगेको छ । अध्यक्ष नभएको मौका छोपेर बोर्डका कतिपय उच्च अधिकारी विभिन्न कम्पनीसँग मिलेमतो गरी पैसा कमाउने ध्याउन्नमा लागेपछि बजारमा विकृतिहरु बढिरहेका छन् । दोश्रो बजारमै समेत खुलेआम खेलोफड्को भइरहँदा समेत बोर्डमा अध्यक्ष नभएको बाहाना देखाउँदै अन्य कर्मचारी पन्छिने गरेका छन् ।