चाडपर्वको मुखमा उपभोक्तालाई राहात, इन्धनको मूल्य घट्यो

काठमाण्डौ । आयल निगमले इन्धनको मूल्य घटाएको छ ।  

निगमको सोमबार साँझ बसेको सञ्चालक समितिको बैठकले सोमबार मध्यरातिदेखि नै लागू हुने गरी पेट्रोल, डिजेल, मट्टितेल र हवाइ इन्धनको मूल्य घटाउने निर्णय गरेको हो । जसअनुसार पेट्रोलमा प्रतिलिटर १ रुपैयाँ, मट्टितेल तथा डिजेलमा प्रतिलिटर २ रुपैयाँ र हवाइ इन्धनको मूल्यमा प्रतिलिटिर ६ रुपैयाँ घटाइएको छ । 

मूल्य घटेपछि क्षेत्रअनुसार पेट्रोलको मूल्य १५५ देखि १५८ रुपैयाँ, डिजलको मूल्य १४६ देखि १४७ रुपैयाँसम्म कायम भएको छ ।  

निगमले आन्तरिक हवाइ इन्धनको मूल्य घटाएर प्रतिलिटर १२६ रुपैयाँ कायम गरेको छ । अन्तर्राष्ट्रिय हवाइ इन्धनको मूल्य काठमाडौंको त्रिभुवन अन्तर्राष्ट्रिय विमानस्थलमा प्रतिकिलोलिटर ९६० अमेरिकी डलर र पोखरा तथा भैरहवामा ८६० रुपैयाँ प्रतिलिटर कायम गरिएको छ ।

ठूला चाडपर्वको मुखैमा इन्धनको मूल्य घट्दा यातायात तथा ढुवानी खर्च कम भई सर्वसाधारणलाई थोरै भए पनि राहात हुने अपेक्षा गरिएको छ ।  

इन्धनको मूल्य घट्दा दशैंतिहार र छठजस्ता पर्वमा खपत हुने खाद्यान्नको ढुवानी खर्च समेत घट्न गई समग्र मूल्यमै राहात हुनसक्छ । यद्यपि बाढीपहिरोका कारण ठाउँ ठाउँको आवागमन अवरुद्ध भएकोले त्यसबाट बढ्नसक्ने महंगी नियन्त्रणतर्फ भने सरकारले ध्यान दिनुपर्ने देखिन्छ ।