आजदेखि असोज ३० गतेसम्म रात्रिकालीन आन्तरिक उडान हुने

काठमाण्डौ यात्रुको चाप बढेपछि आजदेखि रात्रिकालीन आन्तरिक उडान हुने भएको छ । सरकारले हवाई उडान चापलाई मध्यनजर गर्दै घटस्थापनादेखि पूर्णिमासम्म रात्रिकालीन आन्तरिक उडान सञ्चालन गर्ने जनाएको छ ।  

यससँगै देशभरका विमानस्थलमा बिहान साढे ४ बजेदेखि राति १२ बजेसम्म उडान हुने भएको छ। बाढीपहिरोका कारण सडक सञ्जालमा समस्या उत्पन्न हुँदा दशैंका लागि घर जाने यात्रुहरुको चाप निकै बढेको छ । 

यसै समस्यालाई सम्वोधन गर्न सरकारले असोज १७ देखि असोज ३० गतेसम्म त्रिभुवन अन्तर्राष्ट्रिय विमानस्थल, गौतमबुद्ध, पोखरा अन्तर्राष्ट्रिय विमानस्थललगायतका विमास्थालमा रात्रिकालीन उडान गर्ने निर्णय गरेको हो।

नेपाल नागरिक उड्डयन प्राधिकरणका अनुसार अहिले दैनिक ५ सयभन्दा बढी आन्तरिक उडान भइरहेका छन्।

चाडपर्वमा यात्रुलाई हवाई टिकटमा सहजता र भाडामा न्यूनता ल्याउनेगरी रात्रिकालीन उडानको व्यवस्था मिलाएको जनाइएको छ ।