सांग्रिला डेभलपमेन्ट बैंकको २० औं वार्षिकोत्सव विभिन्न कार्यक्रमका साथ सम्पन्न

काठमाण्डौ । सांग्रिला डेभलपमेन्ट बैंक लिमिटेडले आफ्नो २०औं वार्षिकोत्सव विभिन्न कार्यक्रमका साथ सम्पन्न गरेको छ । वार्षिकोत्सव कार्यक्रमअन्तर्गत बिहान ६ः३० बजे बैंकको केन्द्रिय कार्यालय बालुवाटार काठमाण्डौमा बैंकका प्रमुख कार्यकारी अधिकृत सुयोग श्रेष्ठको स्वागत मन्तव्यपश्चात प्रभातफेरी गरिएको थियो ।  

केन्द्रिय कार्यालयबाट शुरु भएको प्रभातफेरी भाटभटेनी, टंगाल, लक्ष्मण बाबुभवन, नक्साल पेट्रोल पम्प, नारायण चौर, नागपोखरी, उत्तरढोका, गैरीधारा हुँदै बैंकको केन्द्रिय कार्यालय, बालुवाटारमा आएर सम्पन्न गरिएको थियो । यस प्रभातफेरी कार्यक्रममा बैंकले डिजिटल साक्षरतासम्बन्धी विभिन्न व्यानरहरुद्वारा आम जनताहरुमा जनचेतना समेत पुर्याएको थियो ।

प्रभातफेरी कार्यक्रमपश्चात बैंकका सञ्चालक समितिका अध्यक्ष उज्जवल सत्यालले बैंकको २० औं वार्षिकोत्सवसम्बन्धी आफ्नो छोटो मन्तव्य राखेका थिए ।  

साथै, वार्षिकोत्सवकै अवसर पारेर केन्द्रिय कार्यालय काठमाण्डौ, पोखरा क्लष्टर, नेपालगञ्ज क्लष्टर र बर्दिबास शाखामा गरिएको रक्तदान कार्यक्रममा जम्मा २५१ जना व्यक्तिहरुले रक्तदान समेत गरेका थिए ।  

सांग्रिला डेभलपमेन्ट बैंकको मुलुकभर ११२ शाखा कार्यालयहरु र ३० एटीएम रहेका छन् ।