बीआरआई फ्रेमवर्कमा हस्ताक्षर गर्न चिनियाँ पक्ष असमर्थ, भएन समझदारी

काठमाण्डौ । नेपाल र चीनबीच बेल्ट एन्ड रोड इनिसियटिभ (बीआरआई) सहकार्य फ्रेमवर्कमा चिनियाँ पक्षले असमति जनाएपछि हस्ताक्षर हुन सकेन । नेपालले ऋणबाहेक अनुदान मात्रै लिने गरी गरेको प्रस्तावमा चिनियाँ पक्षले असहमति जनाएपछि फ्रेमवर्कमा हस्ताक्षर हुन नसकेको हो ।  

प्रधानमन्त्री केपी शर्मा ओलीको चीन भ्रमणमा नेपाली पक्षले तयार पारेको बीआरआई सहकार्य फ्रेमवर्कका केही शब्दहरुमा चिनियाँ पक्षले असहमतिपूण प्रतिक्रिया जनाएपछि मस्यौदामा हस्ताक्षर हुन नसकेको स्रोतले जनाएको छ ।  

प्रधानमन्त्री ओली र चिनियाँ प्रधानमन्त्री ली छ्याङबीचको द्धिपक्षीय वार्तापछि ९ बुँदे सहमति र समझदारीपत्रमा हस्ताक्षर भएको थियो । यद्यपी यो सहमति मुख्य रुपमा आयोजतागत रुपमा मात्र थियो । भ्रमणमा सहभागी एक अधिकारीका अनुसार आयोजनामा गरिने कार्य आ–आफ्नै तरिकाले लागू हुने र उक्त आयोजनाको कार्यान्वयन बीआरआई अन्तर्गत हुनेछ ।  

चिनियाँ राष्ट्रपति सी चिनफिङसँगको भेटवार्तामा पनि बीआरआई सम्झौताको विषयले स्थान नपाएपछि प्रम ओलीको चीन भ्रमणका दौरानमा सहकार्य फ्रेमवर्कमा हस्ताक्षर नहुने भएको छ ।  

नेपालले पठाएको उक्त फ्रेमवर्कभित्रका ऋण, लगानी र अनुदान जस्ता शब्दहरुमा चिनियाँ र नेपालबीच लामो छलफल भएको थियो । चिनियाँ पक्षबाट उक्त शब्दको फ्रेमवर्कमा असहमति नभएपछि हस्ताक्षर हुन नसकेको स्रोतले जनाएको छ । नेपालले भने सन् २०१७ मा बीआरआईको समझदारीपत्रमा हस्ताक्षर गरेको थियो ।