रविमाथि झण्डै २८ करोड रुपैयाँ गैरकानुनी रुपमा आर्जन गरेको आरोप

काठमाण्डौ । राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामेछानेमाथि झण्डै २८ करोड रुपैयाँ गैरकानुनी रुपमा आर्जन गरेको आरोप लागेको छ । जिल्ला सरकारी वकिलको कार्यालय, कास्कीले लामिछानेमाथि २७ करोड ८९ लाख ४४ हजार रुपैयाँ गैरकानुनी रुपमा आर्जन गरेको आरोप लगाएको हो ।  

लामिछानेपत्नी निकिता पौडेलसहित ५ जनामाथि सम्पत्ति जफत प्रयोजनका लागि मुद्दा चलाइएको जिल्ला सरकारी वकिलको कार्यालय कास्कीले जनाएको छ । स्रोतका अनुसार ५ जनालाई उनीहरुको साथमा रहेको केही सम्पत्ति जफत गर्ने प्रयोजनमा मुद्दा दायर भई प्रतिवादी बनाइएको छ ।

प्रतिवादी बनाइएकाहरुमा रवि पत्नी निकिता पौडेल, छविलला जोशीकी श्रीमति पद्मा बन्जाडे, छोरा रोचक जोशी, लिला पछाईंको आमा राधा पछाईं र दिदी गीता पछाईं रहेका छन् । उनीहरुको सम्पत्ति जफत गर्नुपर्ने मागदाबी गर्दै प्रतिवादी बनाइएको हो ।  

सम्पत्ति शुद्धीकरणमा उक्त ५ जनाको सम्पत्ति जफत गर्न माग गरिएको छ । स्रोतका अनुसार आरोपितहरुको साथमा रहेको सम्पत्ति गैरकानुनी रुपमा आर्जन भएको ठहर भएमा अभियोगबाट मागदाबी भएअनुसारको सम्पत्ति मात्रै जफत हुने र अरु दण्डसजाय भने नहुने व्यवस्था छ ।