सिंगापुरको सेयर बजारमा सूचीकृत कम्पनीको संख्या २० वर्षकै न्यून, यो वर्ष ४ वटा मात्रै आईपीओ जारी

काठमाण्डौ । सिंगापुरको सेयर बजारमा सूचीकृत कम्पनीको संख्या विगत २० वर्षकै न्यून स्तरमा पुगेको छ । फाइनान्सियल टाइम्सका अनुसार यो वर्ष ४ वटा कम्पनी मात्रै सिंगापुर स्टक एक्सचेञ्जमा सूचीकृत भएका छन् ।  

यस्तै सिंगापुर स्टक एक्सचेञ्जमा सूचीकृत कम्पनीको संख्या समेत घटेर ६१७ मा सीमित बनेको छ । जुन सन् २०१३ मा ७८२ रहेको थियो । सूचीकृत कम्पनीहरुको घट्दो संख्याले कम्पनीहरु अन्य बजार विशेष गरेर अमेरिकी सेयर बजारतर्फ पलायन भईरहेको रिपोर्टमा उल्लेख गरिएको छ । कम्पनीहरु राम्रो मूल्यांकन र तरलता भएका सेयर बजारतर्फ आकर्र्षित भईरहेका छन् । चिनियाँ दिग्गज फेसन कम्पनी सियन पनि आफ्नो होस्ट देशलाई बाईपास गर्दै लण्डन स्टक एक्सचेञ्जमा सन् २०२२ देखि सूचीकृत छ । यो कम्पनीको सम्भावित बजार पूँजीकरण ५० अर्ब डलर रहेको छ ।  

यस्तै, सिंगापुरका कम्पनीहरु जस्तै ग्राय्ब र सि ले पनि आईपीओका लागि अमेरिकी सेयर बजारलाई रोजेका छन् । सिंगापुरको सेयर बजारप्रति कम्पनीहरुले देखाएको अविश्वासको समीक्षा गर्न ‘मोनिटरी अथोरिटी अफ सिंगापुर(एमएएस)’ले यही वर्ष देशको सेयर बजारको समीक्षा गरेको थियो । सिंगापुर स्टक एक्सचेञ्ज,एमएएस र सरकारी लगानी कम्पनी टिमासेकको रिभ्यु प्यानले देशको सेयर बजारमा धेरै भन्दा धेरै विदेशी फण्ड म्यानेजर र कम्पनीलाई आकर्षित गर्ने निर्णय गरेका थिए ।  

डियलोजिकका अनुसार यो वर्ष दक्षिणपूर्वी एशियामा आईपीओ मार्फत संकलन भएको रकम विगत १० वर्षकै न्यून हो । तर यो वर्ष  मलेशियामा ४६ वटा, इन्डोनेशियामा ३९ र थाईल्याण्डमा २८ आईपीओ जारी भएका थिए । फिलिपिन्सले यो वर्ष ३ वटा आईपीओबाट मात्रै १९७ मिलियन डलरबराबरको रकम संकलन गरेको छ । जुन सिंगापुरले चारवटा आईपीओबाट संकलन गरेको ३१ मिलियन भन्दा धेरै हो ।  

सिंगापुरले बोन्ड,डेरिभेटीभ र रियल स्टेट इन्भेष्टमेन्ट ट्रष्टका लागि राम्रो मार्केट प्लेटफर्म तयार गरेको छ । तर आईपीओ बजारका लागि भने सिंगापुरको बजारप्रति कम्पनीहरु आकर्षित हुन सकिरहेका छैनन् ।