आगामी साताको बिहीबारसम्म नयाँ गभर्नरको नियुक्ति भइसक्ने, देउवा-ओलीले रोजेका पात्र को हो ?

काठमाण्डौ । नेपाल विद्युत प्राधिकरणका कार्यकारी निर्देशक कुलमान घिसिङको बर्खास्ती प्रकरणले ठूलो प्रभाव पारेन भने आगामी साताको बिहीबारसम्म नेपाल राष्ट्रबैंकले नयाँ गभर्नर पाउनेछ ।  

प्रधानमन्त्री कार्यालयस्थित उच्च स्रोतहरुका अनुसार प्रधानमन्त्री तथा नेकपा एमालेका अध्यक्ष केपी शर्मा ओली र कांग्रेस सभापति शेरबहादुर देउवाबीच गभर्नरको विषयमा उच्चस्तरीय सहमति भइसकेको र यो प्रक्रियालाई अर्को साताको बिहीबारसम्म टुङ्गो लगाइने भएको छ । 

'नेपाल राष्ट्रबैंकको गभर्नरको रुपमा कसलाई अगाडि बढाउने भन्ने विषयमा ओली र देउवाबीच सोमबार साँझ उच्चस्तरको सहमति भइसकेको छ ।' स्रोतले भन्यो-'कुलमानलाई हटाएर विद्युत प्राधिकरणमा ओलीका सालो नाता पर्ने हितेन्द्रदेव शाक्यलाई ल्याउने विषयमा देउवाले समर्थन गरेपछि कांग्रेसको भागमा गभर्नर परेको हो ।'  

स्रोतहरुको दाबीलाई आधार मान्ने हो र नेताहरुबीचको उच्चस्तरको सहमतिमा कुनै नाटकीय परिवर्तन भएन भने राष्ट्रबैंकको आगामी गभर्नरको रुपमा वरिष्ठ बैंकर तथा राष्ट्रबैंकका पूर्व क्याडर ज्ञानेन्द्रप्रसाद ढुंगाना आउने प्रवल सम्भावना छ ।  

यही सम्भावना बुझेका ढुंगानाले आइतबारको मिति राखेर प्रमुख कार्यकारी अधिकृतको रुपमा कार्यरत नविल बैंकबाट राजीनामा दिइसकेका छन् । निकै चतुर बैंकर समेत रहेका ढुंगानाले कुनै संकेत नभई टप पोजिसनमा रहेको बैंकको सीईओ पद नत्यागेको उच्च स्रोतको भनाई छ । 'उहाँले नविलको सीईओ पदसँग जूवा मात्र खेल्नुभएको हो जस्तो लाग्दैन ।' कांग्रेसका एक नेताले भने-'उच्च तहबाट ग्रीन सिग्नल नपाई यस्तो निर्णय भएको हो जस्तो लाग्दैन ।'

 देउवा र ओलीबीच सम्भावित गभर्नरको विषयमा सहमति भएकै कारण सोमबार साँझ बसेको मन्त्रिपरिषद बैठकले गभर्नर सिफारिस समितिको विषयमा औपचारिक निर्णय गरेको थियो । तीन सदस्यीय समिति यसअघि नै टुंगो लागिसकेको भए पनि कांग्रेसका मन्त्रीले होल्ड गर्दा औपचारिकता पाउन सकेको थिएन ।  

अब सिफारिस तथा छनौट समितिले गभर्नर छनौटको आवश्यक प्रक्रिया आज या भोलिदेखि नै सुरु गर्नेछ । सबै काम तीव्र गतिमा अगाडि बढाई आगामी साताको बिहीबारसम्ममा गभर्नर नियुक्त गर्ने गरी तयारी भइरहेको स्रोतहरुले दाबी गरेका छन् ।  

राष्ट्रबैंकका वर्तमान गभर्नर महाप्रसाद अधिकारीको ५ वर्षे कार्यकाल यही चैत २४ गतेदेखि सकिँदैछ ।