दुई बैंकले डिबेञ्चर जारी गर्न सेबोनबाट पाए अनुमति, कुनले कति ?

काठमाण्डौ । दुई वाणिज्य बैंकले ऋणपत्र जारी गर्न नेपाल धितोपत्र बोर्ड (सेबोन)बाट अनुमति पाएका छन् । राष्ट्रिय वाणिज्य बैंक र एनआइसी एशिया बैंकले डिबेञ्चर निष्कासनको अनुमति पाएको हो ।  

राष्ट्रिय वाणिज्य बैंकले ७ वर्षे अवधि र ७ प्रतिशतदरको ‘आरबीसीएल डिबेञ्चर २०८८’ नामक ऋणपत्र जारी गर्न स्वीकृति पाएको छ। बैंकले हजार रुपैयाँ अंकित मूल्यमा २ अर्ब ५० करोड रुपैयाँ बराबरको २५ लाख इकाई डिबेञ्चर जारी गर्न अनुमति पाएको छ।  

बैंकको बिक्री प्रबन्धकमा सानिमा क्यापिटल लिमिटेड रहेको छ । बैंकले चैत ८ गते डिबेञ्चर जारी गर्न अनुमति पाएको छ ।  

त्यस्तै, एनआइसी एशिया बैंकले पनि १० वर्षे अवधिका लागि ७ प्रतिशत ब्याजदरमा ‘एनआइसी एशिया डिबेञ्चर’ नामक ऋणपत्र जारी गर्न अनुमति पाएको छ।  

बैंकले अंकित मूल्य हजार रुपैयाँ दरको ५ अर्ब रुपैयाँ बराबरको ५० लाख इकाई ऋणपत्र जारी गर्न चैत १२ गते स्वीकृति पाएको छ । बैंकको बिक्री प्रबन्धकमा प्रभु क्यापिटल लिमिटेड रहेको छ ।