आम्दानी बढ्दा र खर्च घट्दा नेपाल वेयरहाउजिङको घाटामा ५१% को कमी

काठमाण्डौ । नेपाल वेयरहाउजिङ कम्पनी लिमिटेडको घाटा ५१.२३ प्रतिशतले कम भएको छ । चालु आवको दोस्रो त्रैमासको अपरिष्कृत वित्तीय विवरणअनुसार कम्पनी ४ करोड ४४ लाख रुपैयाँ घाटामा रहेको छ ।  

अघिल्लो आवको उक्त अवधिसम्म पनि कम्पनी ९ करोड २१ लाख रुपैयाँ घाटामा रहेको थियो । कम्पनीको आम्दानी बढ्दा घाटामा कमी आएको हो ।  

समीक्षा अवधिमा कम्पनीले १ करोड ८७ लाख रुपैयाँ आम्दानी गरेको छ । जुन रकम अघिल्लो आवको सोही अवधिमा कम्पनीले आर्जन गरेको तुलनामा १८४ प्रतिशतले बढी हो । अघिल्लो आवमा कम्पनीको आम्दानी ६६ लाख १७ हजार रुपैयाँ थियो ।  

यो अवधिमा कम्पनीको कुल खर्च पनि घटेको छ । कम्पनीको कुल खर्च ९ करोड ८७ लाख रुपैयाँबाट घटेर ६ करोड ३७ लाख रुपैयाँमा सीमित बनेको छ । ६८ करोड ७५ लाख रुपैयाँ चुक्तापूँजी भएको कम्पनीको कुल चालु सम्पत्ति ११ करोड ३३ लाख र कुल चालु दायित्व ९ करोड ८२ लाख रुपैयाँ रहेको छ ।  

कम्पनीको प्रतिसेयर आम्दानी(ईपीएस)६.५३ रुपैयाँले ऋणात्मक, मूल्य आम्दानी अनुपात १४४.१८ गुणा ऋणात्मक र प्रतिसेयर नेटवर्थ ७५.४१ रुपैयाँ ऋणात्मक रहेको छ ।