नेपाल वेयरहाउजिङको आम्दानीमा २६८% को उछाल, घाटा ५१% ले घट्यो

काठमाण्डौ । नेपाल वेयरहाउजिङ लिमिटेडले आम्दानीमा राम्रो सुधार गर्दै घाटालाई उल्लेख्य घटाएको छ । कम्पनीले आज सार्वजनिक गरेको चालु आवको तेस्रो त्रैमाससम्मको अपरिष्कृत वित्तीय विवरणअनुसार कम्पनीले आफ्नो घाटा ५१.८५ प्रतिशतले घटाएको छ ।  

यससँगै कम्पनीको घाटा ६ करोड ७५ लाखमा सीमित बनेको छ । अघिल्लो आवमा भने कम्पनीले १४ करोड २ लाख घाटा व्यहोरेको थियो । यसबीचमा कम्पनीको आम्दानी २६८.८९ प्रतिशतले बढेको छ । कम्पनीले तेस्रो त्रैमाससम्म २ करोड ४४ लाख रुपैयाँ कुल आम्दानी गरेको छ । अघिल्लो आवमा भने कम्पनीको आम्दानी ६६ लाख ३६ हजार मात्रै थियो ।  

यो अवधिमा कम्पनी खर्च घटाउन समेत सफल भएको छ । अघिल्लो आवमा कुल १४ करोड ६९ लाख रुपैयाँ खचिएको कम्पनीले चालु आवमा भने ९ करोड २० लाख मात्रै खचिर्एको छ । ६८ करोड ७५ लाख रुपैयाँ चुक्तापूँजी भएको कम्पनीको कुल चालु सम्पत्ति १४ करोड ३९ लाख र कुल चालु दायित्व १६ करोड ४७ लाख रहेको छ ।  

यस अवधिमा आन्तरिक उत्पादन नरहेकोले अन्नको नयाँ भण्डारण सामान्य रहेको कम्पनीले जनाएको छ। अन्न धितोको सुरक्षणमा ऋण प्रदान गर्ने कार्यको लागि कम्पनीले विभिन्न बैंकहरुसँग सम्झौता गरिसकेको जनाएको छ ।

साथै, नयाँ बैंकहरूलाई समेत आबद्ध गर्न छलफल सुरु गरेको छ । जसबाट कम्पनीलाई धितो सुरक्षणको लागि छुट्टै आम्दानी हुने कम्पनीको भनाई छ । कम्पनीले व्यवसाय वृद्धिको लागी विभिन्न व्यवसाय प्रबन्धनात्मक कार्य गरिरहेको छ । यस त्रैमासिक अवधिमा, कपिलवस्तु परियोजनाको प्रगतिको लागि खर्चहरू गरिएको छ। साथै विभिन्न माध्यम वाट किसानसँग जोडिने कार्यको सुरुवात गरिएकोले बजारबाट सकारात्मक प्रतिक्रिया आउन थालेको कम्पनीले उल्लेख गरेको छ ।  

समीक्षा अवधिसम्म कम्पनीको प्रतिसेयर आम्दानी ९.८० रुपैयाँ ऋणात्मक, प्रतिसेयर नेटवर्थ ७२.१९ रुपैयाँ र मूल्य आम्दानी अनुपात ९९.५३ रुपैयाँले ऋणात्मक कायम भएको छ ।