(1).gif)
(2).gif)
.jpg)
.png)
काठमाण्डौ । संसद विघटनको बटमलाइन जेनजी अभियन्ताहरुले नछाडेपछि स्थगन भएको वार्ता पुनः सुरु हुँदैछ ।
दिउँसो २ बजे तोकिएको वार्ताका लागि केहीबेरअघि राष्ट्रपतिसँग छलफल गर्न नेपाली सेनाका प्रधान सेनापति अशोकराज सिग्देल शितल निवास पुगेका छन् ।
.gif)
सेनापति शितल निवास पुग्नुअघि नै राष्ट्रपतिले जेनजी अभियानका केही अभियन्ताहरुलाई बोलाएर छलफल गरेका थिए ।
निर्णायक भनिएको छलफल भने २ बजेपछि सुरु हुने शितल निवास स्रोतले जनाएको छ । त्यसकै लागि सेनापति त्यहाँ पुगेका हुन् ।
अब राष्ट्रपति, सेनापति, जेनजीको तर्फबाट अन्तरिम सरकारको प्रधानमन्त्रीमा प्रस्तावित सुशीला कार्की तथा कानून व्यवसायीबीच त्यहाँ छलफल हुने बुझिएको छ ।
जेन जीको तर्फबाट आफूहरुको बटमलाइन भन्दै संसद विघटनको माग अगाडि सारिएपछि हिजै राति आउने निश्कर्ष रोकिएको छ । जेनजीहरुले राष्टपतिबाट संसद विघटनको घोषणा गरिनुपर्ने अडानलाई छाडेका छैनन् ।
तर राष्ट्रपति भने संसद विघटन नगरी अन्तरिम सरकार गठन गर्ने तयारीमा छन् । उनले संविधानविदहरुसँग अहिलेकै संविधानभित्र रहेर संसद समेत रहेको अवस्थामा संसदभन्दा बाहिर रहेको व्यक्तिलाई कसरी प्रधानमन्त्री बनाउने सकिन्छ भन्ने कानूनी बाटोहरुको विषयमा पर्याप्त छलफल गरेका छन् ।
संसदका ठूलादेखि साना दलहरुले समेत अन्तरिम सरकारको प्रधानमन्त्रीमा सुशीला कार्कीलाई समर्थन गरिसकेका छन् । त्यसकारण प्रधानमन्त्रीमा सुशीला कार्की आउने निश्चित भए पनि सिंगो वार्ता संसद विघटनको मुद्दाले अड्किएको छ । यो विषयलाई कसरी टुंगो लगाइन्छ भन्ने कुरा देशविदेशले चासोको साथ हेरिरहेको छ ।
जेनजीहरुले राखेका संसद विघटन, प्रत्यक्ष निर्वाचित प्रधानमन्त्री लगायतका विषयहरुमा पुराना दलले उधारोमा सहमति गराउनसक्ने खेल पनि सुरु भएको स्रोतहरु बताउँछन् । अहिले जेनजी अभियन्ताहरुलाई उनीहरुका माग पूरा हुनेमा आश्वस्त पार्ने र धोका नहुने ग्यारेण्टीसहित अन्तरिम सरकार गठन गरिहाल्ने हतारोमा राष्ट्रपति देखिएका छन् ।
जेनजीहरु आफ्ना मागप्रति लचक भए वा उधारो सहमति गर्न तयार भए भने आजै अन्तरिम सरकारको प्रधानमन्त्रीको रुपमा पूर्व प्रधानन्यायाधीश सुशीला कार्की नियुक्त हुनेछिन् ।
शितल निवासले शुक्रबार बिहान नै गृहमन्त्रालय र अन्य तालुकदार मन्त्रालयलाई पत्र पठाई नयाँ प्रधानमन्त्रीको सपथ समारोहका तयारी गर्न भनिसकेको छ ।
.png)
.jpg)
