प्राधिकरणले काट्यो १० उद्योगको विद्युत लाइन

NEWS
शनिबार, कार्तिक ८,२०८२ 09:27:08

काठमाण्डौ । नेपाल विद्युत प्राधिकरणले ट्रंकलाइन महसुल नतिर्ने बुटवल–भैरहवा औद्योगिक करिडोरका दश उद्योगमा विद्युत लाइन काटेको छ । प्राधिकरणले शुक्रबार साँझदेखि ती उद्योगमा विद्युत लाइन काटेको हो ।

प्राधिकरणले भलबारी स्वचालित चामल कारखाना, घराना फुड्स्,पञ्चकन्या स्टिल, पञ्चकन्या प्लास्टिक, एभरेष्ट रोलिङ, एसआर स्टिल, एसआर फुड, गोयनका फुड्स, सिद्धार्थ पेट प्लास्ट,र श्याम प्लास्टिक उद्योगको लाइन काटेको हो ।

डेडिकेटेड तथा ट्रंक लाइन प्रयोग गरेको बक्यौता उठाउने विषयमा सरकार, प्राधिकरण र उद्योगबिच पटकपटक विवाद हुँदै आइरहेको छ। उद्योगीहरुले २०७२ माघदेखि २०७५ वैशाखसम्मको अवधिमा डेडिकेटेड तथा ट्रंक लाइन प्रयोग बापतको प्रिमियम महसुल अन्तर्गत पर्ने करिब साढे ५ अर्ब रकम बक्यौता तिर्न बाँकी छ।

प्राधिकरणले पछिल्लोपटक गत असोज १२ गते उद्योगहरुलाई २१ दिनभित्र बक्यौता रकम तिर्न सार्वजनिक सूचना जारी गरेको थियो । तर उद्योगीहरुले महशुल नतिर्ने अडान लिएका थिए ।