विश्वका महान् लगानीकर्ता वारेन बफेटको सन् २०२५ को अन्त्यमा अवकाश, लगानीकर्तालाई ३९,५०,०००% को रिटर्न दिए

काठमाण्डौ । विश्वका सर्वश्रेष्ठ लगानीकर्ता मानिने ९५ वर्षीय वारेन बफेटले आज बर्कशायर ह्याथवेको सीईओ पदबाट अवकाश लिँदै छन् । यससँगै छ दशक लामो उनको नेतृत्वको युगको अन्त्य भएको छ । उनले यस वर्षको मे महिनामा कम्पनीको वार्षिक शेयरधारक बैठकमा अवकाशको घोषणा गरेका थिए, जुन धेरैका लागि आश्चर्यजनक थियो किनकि उनले यसअघि कहिल्यै अवकाश लिने योजना नभएको बताउँदै आएका थिए ।

सन् १९६५ मा बफेटले बर्कशायर ह्याथवेको कमान सम्हालेका थिए, जुन त्यतिबेला एउटा संकटमा परेको टेक्सटाइल कम्पनी थियो । उनको नेतृत्वमा यो कम्पनी विश्वको ट्रिलियन डलर मूल्यको साम्राज्य बनेको छ । त्यतिबेला कम्पनीको शेयर मूल्य मात्र १९ डलर थियो, जुन आज ७५०,००० डलर पुगेको छ । यसले लगानीकर्ताहरूलाई करिब ३९,५०,००० प्रतिशत रिटर्न दिएको छ, जुन विश्वमा अर्को उदाहरण नभएको विशेषज्ञहरू बताउँछन् ।

बफेटलाई ‘ओरेकल अफ ओमाहा’ को उपनाम दिइएको छ । उनले कम्पनीलाई बीमा, रेलवे, ऊर्जा, खुद्रा र विभिन्न ब्रान्डहरूको विशाल पोर्टफोलियो बनाए । कम्पनीसँग हाल करिब ३८० अरब डलर नगद र लगानीयोग्य सम्पत्ति छ । उनको रणनीति सरल थियो : कम मूल्यमा राम्रा कम्पनीहरू किन्ने र लामो समयसम्म होल्ड गर्ने । ऐपल, कोका-कोला, बैंक अफ अमेरिका जस्ता कम्पनीहरूमा गरेको लगानीले उनलाई अरबपति बनायो ।

१ जनवरी २०२६ देखि कम्पनीको दैनिक सञ्चालनको जिम्मेवारी वाइस चेयरम्यान ग्रेगरी एबेलले सम्हाल्नेछन् । एबेल ऊर्जा व्यवसायबाट उदाएका व्यक्ति हुन् र बफेटको विकेन्द्रीकृत व्यवस्थापन शैलीलाई निरन्तरता दिने बताइएको छ । बफेट भने कम्पनीको चेयरम्यान पदमा रहनेछन् र अफिस आउने क्रम जारी राख्ने बताइएको छ ।

बफेटको अवकाशसँगै लगानी जगतमा ठूलो परिवर्तनको संकेत देखिएको छ । उनको अनुपस्थितिमा बर्कशायरको भविष्य र स्टक बजारको दिशालाई लिएर चर्चा चलिरहेको छ । उनको उत्तराधिकारलाई बजारले नजिकबाट हेरिरहेको छ, विशेष गरी कम्पनीको विशाल नगद भण्डारको प्रयोग कसरी हुन्छ भन्नेमा ।

वारेन बफेटको यो यात्रा लगानीकर्ताहरूका लागि प्रेरणा बनेको छ । लामो समयको धैर्य, मूल्यमा आधारित लगानी र नैतिक व्यवसायको उनको सिद्धान्त सधैं याद गरिनेछ ।