होर्मुज अल्टिमेटमपछि ट्रम्पको ब्रेक : भारतीय शेयर बजारमा १५००+ अंकको उछाल

काठमाडौं । सोमबार मध्यपूर्व युद्धको तनावले भारतीय शेयर बजारमा भयानक क्र्यास आएको थियो । तर मंगलबार अमेरिकी राष्ट्रपति डोनाल्ड ट्रम्पको एउटा घोषणाले बजारलाई रकेट बनाइदियो ।

मंगलबार बिहान बीएसईको सेन्सेक्स १५०० अंकभन्दा बढी उछालसाथ ७४,२१२ मा खुल्यो भने एनएसईको निफ्टी २०० अंकभन्दा माथि उक्लेर २२,८७८ मा खुल्यो र पछि २२,८९९ सम्म पुग्यो । ठूला कम्पनीदेखि साना कम्पनीसम्म हरियाली छाएको थियो ।

सोमबार भने बजार पूरै बिग्रिएको थियो । मध्यपूर्वमा युद्ध बढेको खबरले सेन्सेक्स १८३६ अंक घटेर ७२,६९६ मा बन्द भएको थियो भने निफ्टी ६०१ अंकले ओरालो लागेर २२,५१२ मा झरेको थियो । एकै दिनमा लगानीकर्ताको करिब १२ लाख करोड रुपैयाँ डुबेको थियो ।

यो तेजीको मुख्य कारण ट्रम्पको घोषणा हो । ट्रम्पले सोमबार इरानलाई होर्मुज स्ट्रेट पूरै खोल्न ४८ घण्टाको अल्टिमेटम दिएका थिए र इरानका ऊर्जा स्थलमा आक्रमण गर्ने चेतावनी दिएका थिए । तर उनले आक्रमणको योजना ५ दिनका लागि स्थगित गरेको बताए ।

यो घोषणाले विश्व बजारमा राहत मिल्यो । अमेरिकी बजारमा तेजी आयो, एशियाली बजार बूम भए र भारतीय बजारलाई पनि सकारात्मक सन्देश मिल्यो ।

मंगलबार सबैभन्दा बढी उछाल Eternal Share (३.६०%), IndiGo (३.२०%), Asian Paints (३%), Adani Ports (२.९०%), Titan (२.५०%) र Trent (२.४५%) मा देखिएको थियो ।

बजार विश्लेषकहरूले अझै सावधानी अपनाउन सुझाव दिएका छन् । यद्यपि ट्रम्पको यो कदमले तत्कालका लागि बजारमा राहत दिएको छ ।