सार्वजनिक सवारीसाधनको भाडा बढाउन यातायात व्यवसायीको माग, सम्बोधन नभए आफुखुशी वृद्धि गर्ने चेतावनी

काठमाण्डौ । यातायात व्यवसायीहरूले सार्वजनिक सवारीसाधनको भाडा तुरुन्त परिमार्जन गर्न सरकारसमक्ष माग गरेका छन् ।  

नेपाल यातायात व्यवसायी राष्ट्रिय महासंघले शुक्रबार विज्ञप्ति जारी गर्दै नेपाल आयल निगमद्वारा पेट्रोलियम पदार्थको मूल्य बढाइएपछि सोहीअनुसार भाडा समायोजन गर्नुपर्ने आवश्यकता औँल्याएको हो ।

महासंघद्वारा जारी विज्ञप्तिमा हवाई इन्धनको मूल्य बढ्नेबित्तिकै हवाई भाडा समायोजन हुने भए पनि सार्वजनिक यातायाततर्फ सरकारले बेवास्ता गर्नु विभेदपूर्ण व्यवहार भएको उल्लेख गरिएको छ ।

विज्ञप्तिअनुसार, यातायात व्यवस्था विभागले चैत ५ गते नै यात्रुवाहक सवारीका लागि ११.३३ प्रतिशत, पहाडी मालवाहकका लागि १४.२९ प्रतिशत र तराई मालवाहकका लागि ८.८१ प्रतिशत भाडा वृद्धि गर्न भौतिक पूर्वाधार तथा यातायात मन्त्रालयलाई सिफारिस गरेको थियो । तर हालसम्म उक्त निर्णय कार्यान्वयनमा आएको छैन ।

हालको मूल्यवृद्धिका कारण दैनिक लाखौँ रुपैयाँ घाटा बेहोर्दै सेवा सञ्चालन गर्नुपरेको अवस्था रहेको व्यवसायीहरुको भनाई छ । महासंघले संघीय सरकारसहित सबै प्रदेश सरकारलाई वैज्ञानिक आधारमा छिटोभन्दा छिटो भाडा समायोजन गर्न आग्रह गरेको छ ।

साथै माग सम्बोधन नभए व्यवसायीहरूले आफैं भाडा निर्धारण गरी उठाउने चेतावनी समेत दिएका छन् ।