अब बैंक पनि सातामा ५ दिन मात्र खुल्ने, नयाँ कारोबार समय तोकियो

काठमाण्डौ । आइतबारको मन्त्रिपरिषदबाट साताको दुई दिन विदा दिने निर्णयसम्बन्धी सूचना राजपत्रमा प्रकाशित भएसँगै नेपाल राष्ट्रबैंकले पनि सो व्यवस्था कार्यान्वयनमा ल्याएको छ ।  

नेपाल राष्ट्रबैंकको मानव संसाधन व्यवस्थापन विभागले एक सूचना प्रकाशित गर्दै बैंक विदा तथा कार्यालय समयका विषयमा नयाँ व्यवस्था गरेको हो ।  

अब राष्ट्रबैंकले समेत आफू मातहतका सम्पूर्ण विभाग, महाशाखा, कार्यालय तथा इकाईहरुमा सोमबार-चैत २३ गते)देखि नै लागू हुने गरी प्रत्येक शनिवार र आइतबार सार्वजनिक विदा दिइने निर्णय गरेको छ । 

कार्यालय समय सोमबारदेखि शुक्रबारसम्म बिहान ९ बजेदेखि साँझ ५ बजेसम्म कायम गरिएको छ । कात्तिक १६ गतेदेखि माघ १५ गतेसम्मको कार्यालय समय चाहिँ बिहान ९ बजेदेखि अपरान्ह ४ बजेसम्म कायम गरिएको छ । 

बैंकिङ कारोबार समय सोमबारदेखि शुक्रबारसम्म बिहान ९ बजेदेखि ४ बजेसम्म कायम गर्ने केन्द्रीय बैंकको निर्णय छ । कात्तिक १६ गतेदेखि माघ १५ गतेसम्मको बैंकिङ कारोबार समय भने बिहान ९ बजेदेखि दिउँसो ३ बजेसम्म कायम गरिएको छ ।  

यस्तै, केन्द्रीय बैंकले आइतबार राति नै एक सर्कुलर जारी गर्दै कार्यालय समय परिवर्तन भएको र सो व्यवस्था सोमबारदेखि नै लागू हुने उल्लख गरेको छ ।