पक्राउ पुर्जी जारी भएपछि देउवाको प्रतिवाद : ‘भ्रामक र झुटा प्रचार, मेरो जीवन खुला पुस्तक हो’

काठमाण्डौ । सम्पत्ति शुद्धीकरण अनुसन्धान विभागले पूर्वप्रधानमन्त्री शेरबहादुर देउवा र उनकी पत्नी डा. आरजु राणा देउवाविरुद्ध पक्राउ पुर्जी जारी गरेपछि देउवाले सामाजिक सञ्जालमार्फत वक्तव्य जारी गर्दै आरोपलाई ‘भ्रामक र झुटा प्रचार’ भनेका छन् ।

देउवाले आफू र परिवारको सम्पत्ति विवरण सार्वजनिक पदमा रहँदा सरकारी निकायमा यथार्थ रूपमा पेश गरेको उल्लेख गर्दै सबैलाई अतिरञ्जित सूचनाबाट भ्रममा नपर्न अपिल गरेका छन् । उनीहरू हाल स्वास्थ्य उपचारका लागि विदेशमा रहेको पनि उनले जानकारी दिएका छन् ।

देउवाले फेसबुकमा जारी गरेको वक्तव्यमा भनेका छन्, “म र मेरो परिवारका बारेमा सम्पत्ति शुद्धीकरण सम्बन्धि अनुसन्धान सुरु गरिएको भन्ने जानकारी सञ्चार माध्यमबाट थाहा पाएँ । म र मेरो परिवारका बारेमा सम्पत्ति सम्बन्धि विषयमा भ्रामक र झुटा प्रचारबाजी भएको जानकारी गराउन चाहन्छु ।”

उनले थप भनेका छन्, “नेपालको कानुन अनुसार हामीले सार्वजनिक पदमा रहँदा हाम्रो सम्पत्तिको यथार्थ विवरण सम्बन्धित सरकारी निकायमा पेश गरेको अवगत गराउन चाहन्छु । मेरो जीवन एउटा खुल्ला पुस्तकका रुपमा रहेको छ । बास्तविकता समयक्रमसँगै खुल्दै जाने नै छ । अतिरञ्जना गरी सार्वजनिक भएका विवरणहरूबाट भ्रममा नपर्न सबैमा अपिल गर्दछु ।”

देउवाको मुख्य तर्क

-सार्वजनिक पदमा रहँदा कानुनबमोजिम सम्पत्ति विवरण सरकारी निकायमा बुझाएको ।

-जीवनभर लोकतन्त्र, विधिको शासन र पारदर्शिताका लागि संघर्ष गरेको ।

-गृहमन्त्री हुँदा २०४८ मा अख्तियार दुरुपयोग अनुसन्धान आयोग ऐन र प्रधानमन्त्री भएका बेला २०५९ मा भ्रष्टाचार निवारण ऐन ल्याएको ।

-हाल स्वास्थ्य उपचारका लागि विदेशमा रहेको र उपचार जारी रहेको ।

सम्पत्ति शुद्धीकरण अनुसन्धान विभागले जिल्ला अदालत काठमाडौंबाट देउवा दम्पतीविरुद्ध पक्राउ पुर्जी लिएको हो । उनीहरू हाल विदेशमा भएकाले पक्राउ गर्न नसकिएको र इन्टरपोल नोटिस जारी गर्ने प्रक्रिया अघि बढेको सम्बन्धित स्रोतहरूले जनाएका छन् ।

यो घटनाले राजनीतिक वृत्तमा चर्चा बढाएको छ । देउवाले भने आरोपलाई अस्वीकार गर्दै तथ्य र कानुनी प्रक्रियामाथि विश्वास व्यक्त गरेका छन् ।