रवि लामिछानेको सांसद पद निलम्बनको माग, सर्वोच्चमा रिट दर्ता

काठमाण्डौ । राष्ट्रिय स्वतन्त्र पार्टी (रास्वपा)का सभापति रवि लामिछानेलाईसांसदको हैसियतमा काम गर्न नदिन माग गर्दै सर्वोच्च अदालतमा रिट दायर गरिएको छ ।

अधिवक्ता आयुष बडालसहितका निवेदकहरूले लामिछानेविरुद्ध सम्पत्ति शुद्धीकरणसम्बन्धी मुद्दा अदालतमा विचाराधीन रहेकाले उनी सार्वजनिक पदमा रहँदा स्वतः निलम्बनमा पर्नुपर्ने दाबी गरेका छन् । 

त्यसैले उनलाई सांसदको रूपमा काम गर्न नदिन अदालतबाट आदेश जारी गर्नुपर्ने माग गरिएको हो ।

तीन दिनअघि दर्ताका लागि पेस गरिएको उक्त रिट अझैसम्म सर्वोच्च अदालत प्रशासनले दर्ता गरेको छैन । नियमअनुसार दर्ता गर्न नमिल्ने भए दरपीठ आदेश दिनुपर्ने व्यवस्था भए पनि हालसम्म त्यस्तो आदेश जारी गरिएको छैन ।

सर्वोच्च अदालत प्रशासनका स्रोतका अनुसार, रिटबारे माथिल्लो तहलाई जानकारी गराउनुपर्ने भन्दै हाललाई निवेदन रोकिएको अवस्थामा राखिएको छ ।