धरौटीमा छुटेका शेखर गोल्छा पुनः पक्राउ

काडमाण्डौ । केन्द्रीय अनुसन्धान ब्युरो (सीआईबी) ले व्यवसायी शेखर गोल्छालाई पुनःपक्राउ गरेको छ । धितोपत्र कसुरमा ५ लाख रुपैयाँ धरौटी बुझाएर रिहा भएलगत्तै गोल्छा पुनः पक्राउ परेका हुन् ।

सोमबार सर्वोच्च अदालतका न्यायाधीशद्वय महेश शर्मा पौडेल र श्रीकान्त पौडेलको इजलासले धितोपत्रसम्बन्धी मुद्दामा गोल्छालाई धरौटीमा छाड्न आदेश दिएको थियो। अदालतले अनुसन्धानका क्रममा आवश्यक प्रक्रिया पूरा नगरी हिरासतमा राखिएको ठहर गर्दै पूर्व आदेशहरू बदरसमेत गरेको थियो।

तर, अदालतको आदेश सार्वजनिक भएको केही घण्टामै सीआईबीले उनलाई बीमा ऐन, २०७९ अन्तर्गतको छुट्टै कसुरमा पुनः पक्राउ गरेको छ। 

बीमा ऐन, २०७९ अनुसारको कसुरको सम्बन्धमा चाहिँ पक्राउ अनुमति जारी नभएको र निवेदनमा समेत त्यसबारे जिकिर नभएको भन्दै बोलिराख्न नपर्ने अदालतले आदेशमा उल्लेख गरेको थियो । यो आदेशपछि प्रहरीले सोही कसुरमा गोल्छालाई पक्राउ गरेको हो ।

गोल्छालाई नेपाल प्रहरीको केन्द्रीय अनुसन्धान ब्यूरो (सीआईबी) ले वैशाख १० गते काठमाडौंको नक्सालबाट पक्राउ गरेको थियो।