दक्षिण कोरियाली कम्पनीहरुको अत्यधिक बोनस केन्द्रीय बैंकका लागि बन्यो टाउको दुखाई, मुद्रास्फीति बढ्ने चेतावनी

काठमाण्डौ । दक्षिण कोरियाको केन्द्रीय बैंक बैंक अफ कोरियाले प्रमुख प्रविधि कम्पनीहरूमा वितरण भइरहेको अत्यन्त ठूलो बोनसले देशको मुद्रास्फीतिमा थप चाप पार्न सक्ने चेतावनी दिएको छ।

केन्द्रीय बैंकका अनुसार, हाल मुद्रास्फीति पहिले नै लक्ष्यभन्दा माथि छ र आगामी वर्षसम्म पनि करिब २ प्रतिशत लक्ष्यभन्दा माथि रहन सक्ने अनुमान गरिएको छ। हालको मूल्यवृद्धि ऊर्जा मूल्य वृद्धि र भू–राजनीतिक तनावका कारण प्रभावित भए पनि, बैंकले अब तलब वृद्धि र बोनस प्रणाली दीर्घकालीन दबाबको नयाँ स्रोत बन्न सक्ने बताएको छ।

विशेषगरी सेमिकन्डक्टर क्षेत्रमा काम गर्ने कर्मचारीहरूले पाएको अत्यधिक बोनसले यो चिन्ता बढाएको हो। एसके हाईनिक्स र सामसुङ इलेक्ट्रिोनिक्स जस्ता ठूला कम्पनीहरूमा नाफासँग जोडिएको बोनस प्रणाली लागू भएपछि केही कर्मचारीहरूले लाखौं अमेरिकी डलर बराबरको बोनस पाउन थालेका छन्।

रिपोर्टअनुसार, केही सम्झौताअनुसार कम्पनीहरूले आफ्नो सञ्चालन नाफाको करिब १० प्रतिशत देखि १०.५ प्रतिशतसम्म बोनस कोषका रूपमा छुट्याएका छन्। यसले गर्दा एक जना सेमिकन्डक्टर कर्मचारीले वर्षमा करोडौं वोनसम्म बोनस पाउन सक्ने अवस्था बनेको छ।

केन्द्रीय बैंकको भनाइमा, यस्ता एकदमै ठूलो र असामान्य बोनसले सुरुमा त केवल एक सीमित क्षेत्रमा प्रभाव पार्ने भए पनि, पछि अन्य उद्योगमा पनि तलब वृद्धि माग बढ्न सक्छ। त्यसले वस्तु तथा सेवाको माग बढाएर मूल्यमा थप वृद्धि गराउन सक्छ।

यसका साथै, यस्तो उच्च आय पाउने कर्मचारीहरूले उपभोग खर्च बढाइरहेका संकेत पनि देखिएको छ। विशेषगरी कपडा, गहना तथा विलासी वस्तुको बिक्री बढेको र केही क्षेत्रका डिपार्टमेन्ट स्टोरहरूको बिक्री उल्लेख्य रूपमा वृद्धि भएको बताइएको छ।

तर बैंकले स्पष्ट पारेको छ कि सामान्य अवस्थामा बोनसले ठूलो आर्थिक प्रभाव पार्दैन, किनकि यो स्थायी तलब वृद्धि होइन। तर अहिलेको जस्तो अत्यधिक ठूलो र केन्द्रित बोनस प्रणालीले बजारमा अपेक्षा र तलब संरचना दुवै परिवर्तन गर्न सक्ने जोखिम भने बढेको छ।