स्विट्जरल्यान्डलाई हराउँदै अर्जेन्टिना विश्वकपको सेमिफाइनलमा, अब इङ्ग्ल्यान्डसँग भिड्ने

काठमाण्डौ । रोमाञ्चक र उतारचढावपूर्ण खेलमा अर्जेन्टिनाले स्विट्जरल्यान्डलाई ३–१ गोलले पराजित गर्दै विश्वकपको यात्रा अगाडि बढाएको छ। निर्धारित ९० मिनेटको खेल १–१ को बराबरीमा सकिएपछि अतिरिक्त समयमा अर्जेन्टिनाले दुई गोल थप्दै शानदार जित निकालेको हो।

खेलको सुरुवातमै अर्जेन्टिनाले अग्रता लिएको थियो। १०औँ मिनेटमा एलेक्सिस म्याक एलिस्टरले गोल गर्दै टोलीलाई १–० को अग्रता दिलाए। लियोनल मेस्सीको कर्नरबाट आएको बललाई सदुपयोग गर्दै म्याक एलिस्टरले अर्जेन्टिनाका लागि महत्वपूर्ण गोल गरेका थिए।

दोस्रो हाफमा स्विट्जरल्यान्डले उत्कृष्ट पुनरागमन गर्दै ६७औँ मिनेटमा डान एनडोयेको गोलमार्फत खेल १–१ को बराबरीमा ल्यायो। त्यसपछि दुवै टोलीले विजयी गोलका लागि प्रयास गरे पनि निर्धारित समयमा थप गोल हुन सकेन।

अतिरिक्त समयमा अर्जेन्टिनाले खेल आफ्नो पक्षमा पार्यो। ११२औँ मिनेटमा जुलियन अल्भारेजले उत्कृष्ट गोल गर्दै अर्जेन्टिनालाई पुनः अग्रता दिलाए। खेलको अन्तिम क्षणमा १२०औँ मिनेटपछि लाउटारो मार्टिनेजले गोल थप्दै अर्जेन्टिनाको ३–१ को जित सुनिश्चित गरे।

खेलको अर्को महत्वपूर्ण क्षण ७२औँ मिनेटमा आयो, जब स्विट्जरल्यान्डका ब्रेल एम्बोलोले दोस्रो पहेँलो कार्ड पाएपछि मैदान छाड्नुपर्यो। त्यसपछि स्विट्जरल्यान्ड १० खेलाडीमा सीमित भएको थियो।

यो जितसँगै अर्जेन्टिनाले कठिन प्रतिस्पर्धापछि प्रतियोगितामा आफ्नो दाबेदारी कायम राखेको छ भने स्विट्जरल्यान्डको विश्वकप यात्रा समाप्त भएको छ। अर्जेन्टिनाले अब सेमिफाइनलमा इङ्ग्यालण्डको सामना गर्नेछ ।