यसपटक फिफा विश्वकप कुन राष्ट्रले जित्ला ? यस्तो छ एआईको भविष्यवाणी ?

NEWS
मंगलवार, असार ३०,२०८३ 14:55:00

काठमाण्डौ । सन् २०२६ को फिफा पुरुष विश्वकप अन्तिम चरणमा प्रवेश गरिरहेका बेला अल जजिराको एजे ल्याब्सले नौ प्रमुख एआई मोडलमार्फत प्रतियोगिताको अन्तिम नतिजाको सम्भावित प्रक्षेपण सार्वजनिक गरेको छ।

उपलब्ध सबै तथ्यांक, टोलीको प्रदर्शन, खेलाडीको क्षमता, टोलीको गहिराइ तथा प्रतियोगिताभरको लयलाई आधार बनाएर गरिएको विश्लेषणमा फ्रान्स विश्वकप उपाधि जित्ने सबैभन्दा बलियो दाबेदारका रूपमा देखिएको छ। नौमध्ये पाँच एआई मोडल –जेमीनी, ग्रोक, डिपसिक, ली, च्याट र क्वेयनले फ्रान्सलाई च्याम्पियन बन्ने अनुमान गरेका छन्।

यता, साविक विजेता अर्जेन्टिनालाई बाँकी चार एआई मोडल– च्याट जीपीटी, क्लाउड, को पाइलट र मेटा एआईले उपाधि जित्ने टोलीका रूपमा रोजेका छन्।

उपविजेताको भविष्यवाणी भने विभाजित देखिएको छ। फ्रान्स र अर्जेन्टिनाले समान तीन–तीन मत प्राप्त गरेका छन् भने इंग्ल्यान्डलाई दुई र स्पेनलाई एक मत परेको छ। तेस्रो स्थानका लागि भने स्पेन स्पष्ट रूपमा अगाडि देखिएको छ।

नौमध्ये छ एआई मोडलले स्पेनलाई तेस्रो स्थानमा रहने प्रक्षेपण गरेका छन् भने इंग्ल्यान्डले दुई र फ्रान्सले एक मत प्राप्त गरेको छ।

यी भविष्यवाणीले विश्वकपको अन्तिम चारमा पुगेका फ्रान्स, अर्जेन्टिना, स्पेन र इंग्ल्यान्ड नै उपाधिका प्रमुख दाबेदार रहेको एआई मोडलहरूको साझा निष्कर्ष देखाए पनि हालको प्रदर्शन, टोलीको सन्तुलन र प्रतियोगिताको लयलाई मूल्याङ्कन गर्ने तरिकामा मोडलहरूबीच केही फरक दृष्टिकोण रहेको पनि संकेत गर्छ।

विश्वकप सेमिफाइनलमा जुलाई १४ मा फ्रान्स र स्पेन तथा जुलाई १५ मा इंग्ल्यान्ड र अर्जेन्टिनाबीच प्रतिस्पर्धा हुनेछ। तेस्रो स्थानका लागि जुलाई १८ मा खेल हुनेछ भने फाइनल जुलाई १९ मा आयोजना हुनेछ।