माइक्रोफाइनान्समा उच्च सेयरभाउ भएको कम्पनीमा लोअर सर्किट, एकैदिन घट्यो रु.१०८०!

काठमाण्डौ । माइक्रोफाइनान्स सेक्टरमा सबैभन्दा धेरै सेयरभाउ रहेको आत्मनिर्भर लघुवित्तको सेयरभाउ आज एकैदिन एक हजार रुपैयाँभन्दा बढीले घटेको छ ।  

कम्पनीको सेयरभाउ १५ प्रतिशतले घटेर ६ हजार १२० रुपैयाँ कायम भएको छ । नेप्सेमा हाल ५० माइक्रोफाइनान्स कम्पनी सूचीकृत छन् । जसमध्ये सबैभन्दा धेरै सेयरमूल्य आत्मनिर्भर लघुवित्तको ६ हजार रुपैयाँमाथि छ ।  

कम्पनीको कुल सूचीकृत सेयर संख्या ८ लाख ९५ हजार ७२ कित्ता रहेको छ । जसमध्ये कारोबार गर्न मिल्ने सेयर जम्मा २ लाख ९२ हजार ६१ कित्ता मात्रै रहेको छ ।  

सीमित कित्ता सेयर भएकाले यो कम्पनीको सेयरमा लगानीकर्ताको आकर्षण देखिन्छ । सीमित आपूर्ति भएका कम्पनीमा लगानीकर्ताको माग बढ्दा मूल्यमा तीव्र उतारचढाव देखिने गर्छ । आज नेप्सेमा २६० कम्पनीको मूल्य बढ्दा आत्मनिर्भर लघुवित्तलगायत १३ कम्पनीको सेयरभाउ भने घट्न पुगेको छ ।  

केही सेयर लगानीकर्ता कम संख्यामा उपलब्ध तर उच्च मूल्य भएका सेयरमा आकर्षित हुने गर्छन् । यस्तो अवस्थामा माग बढ्दा मूल्यमा तीव्र वृद्धि देखिन्छ । आत्मनिर्भर लघुवित्तको सेयरभाउ पनि माग बढाएर साढे ७ हजार रुपैयाँभन्दा माथि पुर्याइएको थियो ।  

यसअघिका दिनमा बजार घटेपनि यो कम्पनीको मूल्य भने लगातार ३ कारोबार दिन बढेको थियो । त्यसअघि पनि यो कम्पनीको मूल्य ६ कारोबार दिन लगातार बढेको थियो त्यसपछि दुई कारोबार दिन भने करेक्सन देखिएको थियो ।  

पछिल्ला दिनमा यो कम्पनीको मूल्य तीव्र रुपमा बढेपछि केही लगानीकर्ताले नाफा बुक गर्दा आज यो कम्पनीको मूल्य घटेको बुझ्न सकिन्छ ।  

नेपाल स्टक एक्सचेञ्ज (नेप्से)ले गत वैशाख ७ गतेदेखि सूचीकृत कम्पनीको मूल्यमा दैनिक १५ प्रतिशत सर्किटको व्यवस्था लागू गरेको थियो । जसअन्तर्गत कुनै पनि कम्पनीको मूल्य १५ प्रतिशतसम्म घटबढ हुने व्यवस्था छ ।  

उक्त व्यवस्थाले गर्दा पनि आत्मनिर्भर लघुवित्तका लगानीकर्ताले आज एकदिनमै प्रतिकित्ता १००० रुपैयाँ गुमाएका छन् ।