भोटेकोसीमा खसेको गाडीको उद्धारमा खटेकालाई हौसला दिन घटनास्थल पुगे गृहमन्त्री गुरुङ

काठमाण्डौ । भोटेकोसी नदीमा शनिबार साँझ चालकसहित खसेको विद्युतीय सवारीसाधन र चालकको खोजीका लागि राज्यका तीनवटै सुरक्षा निकायले व्यापक उद्धार अभियान सञ्चालन गरेका छन्। उद्धार कार्यको अनुगमन तथा सुरक्षाकर्मीको मनोबल बढाउन गृहमन्त्री सुधन गुरुङ स्वयं घटनास्थल पुगेका छन्।

घटनास्थलको निरीक्षणपछि १० वटा ड्रोन, नेपाली सेना, नेपाल प्रहरी र सशस्त्र प्रहरी बलका सुरक्षाकर्मी तथा गोताखोरलाई परिचालन गरिएको छ। उनीहरूले कालिका गाउँपालिका–३ तल्लो धारापानीका २२ वर्षीय सविन तामाङको खोजी तीव्र बनाएका छन्।

जिल्ला विपद् व्यवस्थापन समितिले खोज तथा उद्धार अभियानको समन्वय गरिरहेको जनाएको छ। समितिका अनुसार दुर्घटनास्थल गहिरो खोँचमा रहेको, नदीको पानी अत्यधिक धमिलो भएको तथा किनारमा विशाल चट्टान रहेका कारण उद्धार कार्य निकै जोखिमपूर्ण र चुनौतीपूर्ण बनेको छ।