३०४% ले बढ्यो कालिका लघुवित्तको नाफा, ईपीएसमा पनि ३ गुणा बढीको बढोत्तरी

काठमाण्डौ । कालिका लघुवित्त वित्तीय संस्था लिमिटेडले आफ्नो व्यवसायलाई विस्तार गर्दै वित्तीय अवस्था सुधार गरेको छ । संस्थाले गत आवको चौथो त्रैमाससम्म अधिकांश वित्तीय सूचकहरुको अवस्थामा सकारात्मक परिवर्तन ल्याएको छ ।

संस्थाले उक्त अवधिसम्म आफ्नो नाफा ३०४.५९ प्रतिशतले बढाएको छ । संस्थाले चौथो त्रैमाससम्म १२ करोड २८ लाख १४ हजार रुपैयाँ नाफा कमाएको छ । गत आवको सोही अवधिसम्म संस्थाले ३ करोड ३ लाख रुपैयाँ नाफा कमाएको थियो ।

इम्पेयरमेन्ट चार्ज घट्नु र खुद ब्याज आम्दानी बढ्नु नाफा वृद्धिका मुख्य आधारहरु हुन् । संस्थाले इम्पेयरमेन्ट चार्जका लागि ५ करोड ३० लाख रुपैयाँ छुट्टाएको छ । अघिल्लो आवमा यस्तो रकम ६ करोड ३७ लाख थियो ।

यस्तै संस्थाको खुद ब्याज आम्दानी पनि ३५ करोड ६७ लाखबाट बढेर ४७ करोड ९ लाख पुगेको छ । संस्थाको खुद सञ्चालन आम्दानी ४८ करोड ९४ लाख र सञ्चालन मुनाफा १८ करोड १८ लाख रहेको छ ।

वितरणयोग्य मुनाफा ८ करोड ८२ लाख पुर्याएको संस्थाको लाभांश क्षमता १९.६८ प्रतिशत कायम भएको छ । अधिकांश सूचकमा प्रगति हासिल गरेको देखिएपनि संस्थाको खराब कर्जा अनुपात भने बढेको छ । अघिल्लो आवमा ८.२७ प्रतिशत रहेको संस्थाको खराब कर्जा अनुपात बढेर ९.७८ प्रतिशत पुगेको छ ।

संस्थाको पूँजीकोष अनुपात ११.६७ प्रतिशत, कस्ट अफ फण्ड ६.०१ प्रतिशत र सिडी रेसियो ११४.६५ प्रतिशत कायम भएको छ । समीक्षा अवधिसम्म संस्थाको निक्षेप संकलन १ अर्ब ६६ करोडबाट बढेर २ अर्ब ३ करोड पुगेको छ भने कर्जा प्रवाह पनि ४ अर्ब ७५ करोडबाट बढेर ५ अर्ब ३४ करोड पुगेको छ ।

संस्थाको प्रतिसेयर आम्दानी समेत ७.४५ प्रतिशतबाट बढेर २७.४० रुपैयाँ पुगेको छ । अघिल्लो आवको तुलनामा यो ३.६७ गुणाले बढी हो । यसैगरी संस्थाको प्रतिसेयर नेटवर्थ १७८.७३ रुपैयाँ, प्रतिसेयर कुल सम्पत्तिको मूल्य १२९०.०२ रुपैयाँ, मूल्य आम्दानी अनुपात २८.२० गुणा र तरलता अनुपात ९.११ प्रतिशत कायम भएको छ ।