.gif)
.png)
काठमाण्डौ । हेटौँडा कपडा उद्योग सञ्चालनमा आएसँगै सरकारले त्यसका लागि आवश्यक कच्चा पदार्थ स्वदेशमै उत्पादन गर्ने तयारी तीव्र बनाएको छ। उद्योगमन्त्री गौरीकुमारी यादवले कपडा उद्योगका लागि आवश्यक कपास नेपालमै उत्पादन गर्न निजी क्षेत्र तथा व्यवसायीलाई कपास खेतीमा लगानी गर्न आह्वान गरेकी छन्।
नेपालका कपडा उद्योगले ठूलो मात्रामा कच्चा कपास आयात गर्नुपर्ने अवस्था रहेको भन्दै मन्त्री यादवले अब स्वदेशमै कपास उत्पादन बढाएर आयात निर्भरता घटाउनुपर्ने बताएकी हुन्। उनका अनुसार कपास खेती विस्तार गर्न सके कपडा उद्योगको कच्चा पदार्थ आपूर्ति सहज हुनुका साथै किसानको आम्दानी र रोजगारीका अवसरसमेत बढ्नेछन्।
कपास खेती विस्तारका विषयमा उद्योगमन्त्री यादवले कृषि मन्त्री गीता चौधरीसँग पनि छलफल गरेकी छन्। छलफलका क्रममा दाङ, बाँके र बर्दियालगायतका जिल्लामा व्यावसायिक कपास खेतीका लागि उपयुक्त सम्भावना रहेको विषयमा चर्चा भएको जनाइएको छ।
नेपालमा कपास खेतीको सम्भावना भए पनि ठूलो व्यावसायिक स्तरमा उत्पादन हुन नसक्दा कपडा उद्योगहरू कच्चा पदार्थका लागि विदेशमा निर्भर रहँदै आएका छन्। सरकारले कपडा उद्योगसँगै कपास उत्पादनलाई समानान्तर रूपमा अघि बढाउन सके आयात प्रतिस्थापन र स्वदेशी उत्पादन प्रवर्द्धनमा महत्वपूर्ण योगदान पुग्ने अपेक्षा गरिएको छ।
(1).gif)
बुटवल धागो कारखाना पनि सञ्चालनको तयारी
यता लामो समयदेखि बन्द रहेको बुटवल धागो कारखाना पुनः सञ्चालनमा ल्याउने प्रक्रिया पनि अगाडि बढेको छ।
उद्योग विभागका महानिर्देशक जितेन्द्र बस्नेतका अनुसार कारखाना सञ्चालनका लागि आवश्यक सम्पत्ति तथा दायित्व मूल्यांकनको काम अन्तिम चरणमा पुगेको छ। मूल्यांकन सम्पन्न भएपछि कारखाना सञ्चालनको थप प्रक्रिया अघि बढाइने तयारी छ।
हेटौँडा कपडा उद्योग सञ्चालन, कपास खेती विस्तार र बुटवल धागो कारखाना पुनः सञ्चालन गर्ने योजना एकसाथ अघि बढे नेपालमा कपासदेखि धागो र धागोदेखि कपडासम्मको स्वदेशी उत्पादन शृंखला निर्माण गर्ने आधार तयार हुने देखिएको छ।
सरकारले स्वदेशी उद्योगका लागि आवश्यक कच्चा पदार्थ नेपालमै उत्पादन गर्न निजी क्षेत्रलाई प्रोत्साहन गर्ने नीति लिएको जनाएको छ। कपास खेती विस्तारमार्फत विदेशी कपासको आयात घटाउने, स्थानीय उत्पादन बढाउने, किसानलाई नयाँ व्यावसायिक अवसर दिने र रोजगारी सिर्जना गर्ने सरकारको लक्ष्य छ।
सरकारको योजना प्रभावकारी रूपमा कार्यान्वयन भए लामो समयदेखि आयातमा निर्भर नेपाली कपडा उद्योगले स्वदेशी कच्चा पदार्थमा आधारित उत्पादनतर्फ अघि बढ्ने सम्भावना बलियो हुने देखिएको छ।
.gif)
.png)
.jpg)
.jpg)
प्रतिक्रिया
0 प्रतिक्रियाअहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।