हर्कको प्रश्न : स्याउ पनि फलेको थिएन होला, प्रधानमन्त्री के चाख्न मुस्ताङ गएका हुन् ?

NEWS
सोमबार, भाद्र ८,२०८३ 17:14:55

काठमाण्डौ । श्रम संस्कृति पार्टीका अध्यक्ष तथा संसदीय दलका नेता हर्क साम्पाङले प्रधानमन्त्री बालेन शाहको मुस्ताङ भ्रमणलाई लिएर प्रतिनिधिसभामा प्रश्न उठाएका छन् ।

सोमबार बसेको प्रतिनिधिसभा बैठकमा बोल्दै साम्पाङले प्रधानमन्त्रीको पदमा बसेपछि व्यक्तिगत भ्रमणसमेत सार्वजनिक चासोको विषय बन्ने भन्दै भ्रमणबारे स्पष्ट जानकारी दिनुपर्ने बताएका हुन् ।

उनले प्रधानमन्त्री शाह मुस्ताङ जाँदा सरकारी स्रोत–साधन र सुरक्षा संयन्त्र प्रयोग भएको उल्लेख गर्दै भ्रमणको उद्देश्यबारे संसद्लाई जानकारी गराउन माग गरे ।

साम्पाङले भने, ‘उहाँ मन्त्रिपरिषद् र संसद्लाई सूचना नदिई जानुभएको हो ? के खान जानुभएको ? हावा थिएन भने काठमाडौंमा हावा छ । मुस्ताङमा स्याउ पनि फलेको थिएन होला अहिले । के चाख्न जानुभएको हो, त्यो भन्नुपर्छ । सदनमा जवाफ दिनुपर्छ ।’

प्रधानमन्त्रीको भ्रमण निजी हो वा सरकारी, त्यसमा राज्यको स्रोत कति प्रयोग भयो र भ्रमणको औपचारिक उद्देश्य के थियो भन्ने विषय स्पष्ट हुनुपर्ने साम्पाङको भनाइ थियो ।

उनले प्रधानमन्त्रीजस्तो सार्वजनिक पदमा बसेका व्यक्तिको गतिविधि पारदर्शी हुनुपर्ने र त्यसबारे संसद्लाई जानकारी गराउनु सरकारको जिम्मेवारी भएको धारणा राखे ।

साम्पाङले सोही बैठकमा बलात्कार तथा यौन हिंसाका घटनाबारे पनि सरकारको ध्यानाकर्षण गराए । उनले यस्ता जघन्य अपराध नियन्त्रणका लागि अझ कडा कानुनी व्यवस्था आवश्यक रहेको बताए ।

उनले नेपालको कानुन नै कमजोर हो वा कानुन कार्यान्वयन गर्ने संयन्त्र कमजोर हो भन्ने विषयमा समेत संसद्मा प्रश्न उठाउँदै प्रभावकारी कार्यान्वयन र कडा दण्डको व्यवस्था आवश्यक रहेको बताए ।