सद्‌गुरुद्वारा प्रधानमन्त्री राहत कोषमा एक करोड सहयोग गर्ने घोषणा

काठमाण्डौ । नेपाल–तिब्बत सीमावर्ती क्षेत्रमा आएको भीषण बाढीबाट ज्यान गुमाएका तथा प्रभावित परिवारप्रति ऐक्यबद्धता जनाउँदै सद्‌गुरुले नेपालस्थित आफ्नो संस्था ईशा नेपालका तर्फबाट प्रधानमन्त्री राहत कोषमा एक करोड रुपैयाँ सहयोग गर्ने घोषणा गरेका छन्। साथै, नेपाललाई आवश्यक अन्य माध्यमबाट समेत सहयोग गर्न आफूहरू तत्पर रहेको उनले बताएका छन्।

बाढीबाट भएको मानवीय तथा भौतिक क्षतिप्रति समभाव व्यक्त गर्न सद्‌गुरुको उपस्थितिमा पुल्चोकस्थित द प्लाजामा विशेष कार्यक्रम आयोजना गरिएको थियो। नेपालप्रति ऐक्यबद्धता जनाउने उद्देश्यले आयोजित कार्यक्रममा अभिनेत्री मनिषा कोइराला, काठमाण्डौ महानगरपालिकाकी कार्यवाहक मेयर सुनिता डङ्गोल, ललितपुर महानगरपालिकाका मेयर चिरिबाबु महर्जनलगायत विभिन्न क्षेत्रका व्यक्तित्वहरूको उपस्थिति थियो।

Sponsored

Sponsored

कार्यक्रममा अभिनेत्री मनिषा कोइरालाले नेपालले पटक–पटक विभिन्न प्राकृतिक विपद्को सामना गर्नुपरेकोमा दुःख व्यक्त गरिन्। उनले जलवायु परिवर्तनबाट उत्पन्न चुनौती सामना गर्न नेपाल, भारत र चीनबीच सहकार्य आवश्यक रहेको धारणा राखिन्।

सद्‌गुरुले भने यति ठूलो विपत्तिका लागि नेपाल सरकारलाई मात्र दोष दिन नहुने बताए। उनले जलवायु परिवर्तनका कारण बढ्दै गएको प्राकृतिक जोखिम न्यूनीकरणका लागि विश्व समुदायले सामूहिक रूपमा काम गर्नुपर्नेमा जोड दिए।

बढ्दो जलवायु परिवर्तनले हिमाली क्षेत्रमा निम्त्याउने विपद् सम्बोधन गर्न नेपाल र छिमेकी मुलुकहरू एकजुट भएर हिमाली क्षेत्रको व्यवस्थापन तथा संरक्षणमा अग्रसर हुनुपर्ने उनको भनाइ थियो।