फुड एम्पायर सिंगापुरद्वारा बाढीपीडितलाई २० हजार अमेरिकी डलर सहयोग

 

काठमाण्डौ । विश्वप्रसिद्ध म्याककफी ब्रान्ड उत्पादक कम्पनी फुड एम्पायर होल्डिङ्स लिमिटेड, सिंगापुरले नेपालका बाढी प्रभावित नागरिकका लागि २० हजार अमेरिकी डलर बराबरको राहत सहयोग उपलब्ध गराएको छ।

कम्पनीले नेपाल चेम्बर अफ कमर्समार्फत बाढी प्रभावित क्षेत्रमा राहत तथा मानवीय सहायता पुर्‍याउने उद्देश्यले उक्त सहयोग उपलब्ध गराएको हो।

हालैको बाढीबाट प्रभावित रसुवालगायतका क्षेत्रमा तत्काल आवश्यक राहत सामग्री उपलब्ध गराउन फुड एम्पायर होल्डिङ्सले सहयोग गरेको जनाइएको छ।

नेपाल चेम्बर अफ कमर्सका कार्यसमिति सदस्य तथा आर्क्स ग्रुपका प्रमुख कार्यकारी अधिकृत राजुल श्रेष्ठका अनुसार फुड एम्पायर होल्डिङ्सले आर्क्स ग्रुपसँगको समन्वयमा नेपाल चेम्बरमार्फत राहत सहयोग उपलब्ध गराएको हो।

उनका अनुसार प्राप्त सहयोगलाई बाढीपीडित नागरिकको तत्कालीन आवश्यकता पहिचान गरी खाद्यान्न तथा अन्य अत्यावश्यक सामग्रीका रूपमा वितरण गर्ने व्यवस्था मिलाइएको छ।

“फुड एम्पायर होल्डिङ्सको चाहनाअनुसार बाढीबाट प्रभावित नागरिकलाई आवश्यक पर्ने आधारभूत सामग्रीलाई प्राथमिकतामा राखेर पहिलो चरणमा माथिल्लो त्रिशूली क्षेत्रमा खाद्यान्न, लत्ताकपडा र स्यानिटरी प्याडलगायत राहत सामग्री वितरण गरिएको छ,” श्रेष्ठले बताए।

पहिलो चरणमा करिब ३ लाख रुपैयाँ बराबरका राहत सामग्री वितरण गरिएको जनाइएको छ।

बाढी प्रभावित क्षेत्रबाट प्राप्त माग र आवश्यकताका आधारमा थप करिब २७ लाख रुपैयाँ बराबरका अत्यावश्यक राहत सामग्री प्रभावित क्षेत्रमा पठाइने श्रेष्ठले जानकारी दिए।

फुड एम्पायर होल्डिङ्सको सहयोगबाट उपलब्ध रकमलाई चरणबद्ध रूपमा बाढीपीडितको तत्काल आवश्यकता सम्बोधन हुने गरी परिचालन गरिने चेम्बरले जनाएको छ।