नेपाली आईटी कम्पनीलाई अन्तर्राष्ट्रिय बजारसँग जोड्दै नास–आईटीको स्वीट्जरल्यान्डमा टेक रोडशो

 

काठमाण्डौ । नेपाल एसोसिएसन फर सफ्टवेयर एन्ड आईटी सर्भिसेस कम्पनीज् (नास–आईटी) ले स्विस नेपाल चेम्बर अफ कमर्स (एसएनसीसी) सँगको सहकार्यमा स्वीट्जरल्यान्डको ज्युरिखमा ‘नेपाल टेक रोडशो स्वीट्जरल्यान्ड २०२६’ सम्पन्न गरेको छ।

सेप्टेम्बर १६ मा आयोजित रोडशोमा नेपाल र स्वीट्जरल्यान्डका व्यवसायी, प्रविधि क्षेत्रका प्रतिनिधि, लगानीकर्ता तथा अन्य सरोकारवालाबीच नेपाली आईटी उद्योगको सम्भावना, अन्तर्राष्ट्रिय सहकार्य र व्यावसायिक विस्तारका विषयमा छलफल भएको थियो।

कार्यक्रममा नेपालको बढ्दो आईसीटी क्षेत्र, दक्ष जनशक्ति, डिजिटल नवप्रवर्तन, आईटी निर्यात तथा आर्टिफिसियल इन्टेलिजेन्स (एआई), सफ्टवेयर विकास, साइबर सुरक्षा, क्लाउड सेवा, डेटा इन्जिनियरिङ र डिजिटल रूपान्तरणका क्षेत्रमा नेपाली कम्पनीहरूको क्षमता प्रस्तुत गरिएको थियो।

नास–आईटीका अध्यक्ष दिपेन चापागाईंले नेपाली आईटी उद्योगले अन्तर्राष्ट्रिय बजारमा आफ्नो क्षमता अझ प्रभावकारी रूपमा प्रस्तुत गर्दै नयाँ व्यावसायिक अवसर र सहकार्य विस्तार गर्नुपर्ने बताए। नेपाली आईटी कम्पनीका सेवा र प्रविधि समाधानलाई विश्व बजारसम्म पुर्‍याउने उद्देश्यले रोडशो आयोजना गरिएको उनको भनाइ थियो।

कार्यक्रममा स्विस नेपाल चेम्बर अफ कमर्सले नेपाल–स्वीट्जरल्यान्ड व्यापार तथा प्रविधि सम्बन्धका साथै नेपाली आईटी कम्पनी र स्विस व्यवसायबीच सहकार्यका सम्भावनाबारे जानकारी दिएको थियो।

रोडशोमा नेपालका १७ वटा आईटी कम्पनीले एक–एक मिनेटको कम्पनी पिचमार्फत आफ्ना सेवा, विशेषज्ञता तथा प्रविधि समाधान प्रस्तुत गरेका थिए।

एआई, साइबर सुरक्षा, प्रडक्ट डेभलपमेन्ट, आईटी सर्भिसेस, बीपीओ, कस्टम वेब तथा एप्लिकेसन डेभलपमेन्ट, क्लाउड इन्फ्रास्ट्रक्चर र डेटा इन्जिनियरिङलगायतका क्षेत्रमा नेपाली कम्पनीहरूले गरिरहेका काम र उपलब्धिबारे पनि प्रस्तुति दिइएको थियो।

कार्यक्रममा सम्भावित व्यावसायिक साझेदारी, लगानी, प्रविधि सहकार्य तथा अन्तर्राष्ट्रिय बजार विस्तारका अवसरबारे समेत छलफल भएको आयोजकले जनाएको छ।

नास–आईटीले नेपाली प्रविधि उद्योगको अन्तर्राष्ट्रिय प्रवर्द्धन तथा विश्व बजारसँग सम्बन्ध विस्तार गर्ने उद्देश्यले विभिन्न मुलुकमा टेक रोडशो आयोजना गर्दै आएको छ। ज्युरिखमा सम्पन्न रोडशोलाई पनि नेपाली आईटी कम्पनीलाई अन्तर्राष्ट्रिय व्यवसाय, लगानी तथा सहकार्यका सम्भावनासँग जोड्ने प्रयासका रूपमा लिइएको छ।

रोडशो स्विस एजेन्सी फर डेभलपमेन्ट एन्ड कोअपरेशन (एसडीसी) लगायतका साझेदार तथा सरोकारवालाको सहयोगमा आयोजना गरिएको थियो भने स्विस नेपाल चेम्बर अफ कमर्स सह–आयोजकका रूपमा सहभागी थियो।