‘सङ्क्रामक पशु रोग नियन्त्रण विधेयक’ राष्ट्रिय सभाबाट सर्वसम्मत पारित

काठमाण्डौ । कृषि, वन तथा पर्यावरणमन्त्री गीता चौधरीले प्रस्तुत गरेको ‘सङ्क्रामक पशु रोग (नियन्त्रण) विधेयक, २०८३’ राष्ट्रिय सभाबाट सर्वसम्मत रूपमा पारित भएको छ।

पशु तथा माछामा देखिने सङ्क्रामक रोगको रोकथाम, नियन्त्रण, निवारण तथा उन्मूलन गरी पशु स्वास्थ्य, जनस्वास्थ्य र वातावरणीय स्वास्थ्यको संरक्षण गर्ने उद्देश्यसहित विधेयक ल्याइएको हो।

विधेयक राष्ट्रिय सभामा २०८३ साउन १४ गते दर्ता भएको थियो। यसअघि विधायन व्यवस्थापन समितिमा विधेयकमाथि दफावार छलफलसमेत भएको थियो।

विधेयकले सङ्क्रामक पशु रोगका कारण हुन सक्ने आर्थिक तथा अन्य क्षति न्यूनीकरण गर्ने, रोगको रोकथाम तथा नियन्त्रणमा सङ्घ, प्रदेश र स्थानीय तहबीच समन्वय कायम गर्ने तथा पशु एवं पशुजन्य पदार्थको सुरक्षित व्यापार प्रवर्द्धनका लागि कानुनी आधार तयार गर्ने लक्ष्य राखेको छ।

सङ्क्रामक रोगको फैलावटले पशुपालन व्यवसायसँगै मानव स्वास्थ्य र वातावरणमा समेत असर पार्न सक्ने भएकाले रोगको निगरानी, नियन्त्रण र आवश्यक प्रतिकार्यलाई व्यवस्थित गर्न विधेयकले कानुनी संरचना निर्माण गर्ने अपेक्षा गरिएको छ।

राष्ट्रिय सभाको सोमबारको बैठक अपराह्न १ः१५ बजेका लागि तय गरिएको थियो।

नोट: संघीय संसदको अनलाइन ‘विधेयकको वर्तमान अवस्था’ पृष्ठमा यो समाचार तयार पार्दासम्म उक्त विधेयकको अवस्था अझै ‘समितिको प्रतिवेदन पेश भएको’ उल्लेख छ। आजको बैठकपछि उक्त पृष्ठ अद्यावधिक हुन बाँकी हुन सक्छ।