संवेदनशील सूचना व्यवस्थापनमा लापरबाही गरेको आरोपमा ओपनएआईद्वारा तीन कर्मचारी बर्खास्त

काठमाडौं। ओपनएआईले संवेदनशील सूचना व्यवस्थापनमा लापरबाही गरेको आरोपमा तीन जना अनुसन्धानकर्तालाई बर्खास्त गरेको छ। तीमध्ये केहीको काम कृत्रिम बुद्धिमत्ता (एआई)मोडलहरूको विश्लेषण गर्ने बाह्य संस्थासँग सम्बन्धित रहेको बताइएको छ।

कम्पनीका प्रवक्ताले बीबीसीलाई दिएको जानकारीअनुसार, अनुसन्धानका क्रममा ती कर्मचारीले कम्पनीको स्थापित प्रक्रियाबाहिर संवेदनशील सूचना व्यवस्थापन गरेको र यस क्रममा कम्पनीका नीतिहरू उल्लंघन गरेको पुष्टि भएको थियो।

“यी व्यक्तिहरूले संवेदनशील सूचना पहुँच र व्यवस्थापनसम्बन्धी हाम्रा नीतिहरू उल्लंघन गरेका कारण हामीले उनीहरूसँगको सम्बन्ध अन्त्य गरेका हौँ,” ओपनएआईका प्रवक्ताले भने।

कम्पनीले बर्खास्त गरिएका कर्मचारीको नाम सार्वजनिक गरेको छैन। तर, कम्तीमा दुई जना ओपनएआईमा एआई सुरक्षा अनुसन्धानमा संलग्न रहेको बताइएको छ।

बीबीसीका अनुसार उनीहरूलाई एआई सुरक्षासम्बन्धी चिन्ता उठाएको कारण बर्खास्त गरिएको नभइ संवेदनशील सूचना कथित रूपमा गलत ढंगले व्यवस्थापन गरेको आरोपमा कारबाही गरिएको हो।