चाडपर्वमा नेपाल टेलिकमको फेस्टिभ अफर, एफटीटीएच जडान निःशुल्कदेखि अनलिमिटेड डेटा प्याकसम्म

NEWS
सोमबार, आश्विन २६,२०८३ 17:13:30

काठमाण्डौ । नेपाल टेलिकमले दसैँ, तिहार र छठपर्वलाई लक्षित गर्दै ग्राहकका लागि विभिन्न छुट र सहुलियतसहितको फेस्टिभ अफर सार्वजनिक गरेको छ।

अफरअन्तर्गत नयाँ एफटीटीएच जडान गर्ने ग्राहकलाई जडान शुल्कमा छुट दिइएको छ भने मोबाइल प्रयोगकर्ताका लागि अनलिमिटेड डेटा, सस्तो भ्वाइस तथा एसएमएस प्याक ल्याइएको कम्पनीले जनाएको छ।

टेलिकमका अनुसार असोज २५ गतेदेखि कात्तिक ३० गतेसम्म नयाँ एफटीटीएच सेवा जडान गर्ने ग्राहकले ५०० रुपैयाँ जडान शुल्क तिर्नुपर्ने छैन।

त्यस्तै, १००, १५० र २०० एमबीपीएस क्षमताका वार्षिक इन्टरनेट प्याकेज खरिद गर्ने ग्राहकले १२ महिनाको शुल्कमा १३ महिनासम्म सेवा लिन पाउनेछन्। सो प्याकेजसँग उपलब्ध हुने बोनस मोबाइल डेटा पनि १३ महिनासम्म प्रयोग गर्न सकिनेछ।

भर्चुअल सेट–टप बक्ससहितको प्याकेजमा ग्राहकले यसअघिदेखि पाइरहेको १ हजार रुपैयाँ छुटसमेत कायम रहने टेलिकमले जनाएको छ।

मोबाइल सेवातर्फ ३० दिन अवधिका विभिन्न फेस्टिभ प्याक ल्याइएको छ।

४९९ रुपैयाँको ‘फेस्टिभल अनलिमिटेड डेटा’ प्याकमा दैनिक ५ जीबी उच्च गतिको डेटा उपलब्ध हुनेछ। दैनिक कोटा सकिएपछि पनि २ एमबीपीएस गतिमा महिनाभर इन्टरनेट चलाउन सकिनेछ।

त्यस्तै, ६९९ रुपैयाँको ‘फेस्टिभल अनलिमिटेड प्रिमियम डेटा’ प्याकमा दैनिक १० जीबी डेटा उपलब्ध हुनेछ। दैनिक सीमा सकिएपछि ३ एमबीपीएस गतिमा इन्टरनेट चलिरहनेछ।