गण्डकीका विभिन्न राजमार्ग अवरुद्ध, केहीमा एकतर्फी आवागमन

काठमाडौं । बाढीपहिरोका कारण गण्डकी प्रदेशका विभिन्न जिल्लाका मुख्य राजमार्ग प्रभावित भएका छन्। नेपाल प्रहरीको पछिल्लो विवरणअनुसार केही सडकखण्डमा एकतर्फी आवागमन भइरहेको छ भने केही पूर्ण रूपमा अवरुद्ध छन्।

म्याग्दीको रघुगंगा गाउँपालिका–२ बैसरीमा असोज १० गते गएको पहिरोले बेनी–जोमसोम सडकखण्ड एकतर्फी सञ्चालनमा छ। यस्तै, नवलपरासी (पूर्व)को बौदीकाली गाउँपालिका–३ स्थित जन्ती पहिरोमा असोज १४ गते गएको पहिरोका कारण कालीगण्डकी करिडोर प्रभावित बनेको छ। उक्त सडकमा साना सवारीसाधन मात्र चल्न सक्ने अवस्था छ भने ठूला सवारीसाधनको आवागमन बन्द छ।

यसैगरी, गोरखाको आरुघाट गाउँपालिका–२, ३ र ९ को नयाँपुल क्षेत्रमा असोज २५ गते बिहान आएको बाढीले सोतीस्थित फलामे पुलमा क्षति पुर्‍याएपछि गोरखाको आरुघाटबाट धादिङ जोड्ने राजमार्ग पूर्ण रूपमा अवरुद्ध भएको छ।