चुनावअघि नेतान्याहूविरुद्ध हजारौँ सडकमा, सुरक्षा चूकको स्वतन्त्र छानबिन माग

NEWS
आईतवार, कार्तिक ८,२०८३ 15:25:49

काठमाण्डौ । इजरायलमा संसदीय निर्वाचन हुनुभन्दा तीन दिनअघि प्रधानमन्त्री बेन्जामिन नेतान्याहूको सरकारविरुद्ध हजारौँ मानिसले प्रदर्शन गरेका छन्।

शनिबार तेल अभिभमा भेला भएका प्रदर्शनकारीले सन् २०२३ अक्टोबर ७ मा हमासले गरेको आक्रमण रोक्न नसक्नुका कारण र सुरक्षा कमजोरीको स्वतन्त्र छानबिन गर्न माग गरेका हुन्। उनीहरूले घटनाको सत्यतथ्य सार्वजनिक गर्न र जिम्मेवार पक्षलाई जवाफदेही बनाउन स्वतन्त्र छानबिन आयोग गठन गर्नुपर्ने बताएका छन्।

‘अक्टोबर काउन्सिल’ नामक समूहले आयोजना गरेको प्रदर्शनमा आक्रमणमा मारिएका तथा बन्धक बनाइएका व्यक्तिका परिवारका सदस्य पनि सहभागी थिए। उक्त समूहले घटनाको छानबिन र जवाफदेहिताको माग गर्दै अभियान चलाउँदै आएको छ।

नेतान्याहूका प्रमुख चुनावी प्रतिस्पर्धी तथा पूर्वसेनाप्रमुख गादी आइजेनकोट पनि प्रदर्शनमा सहभागी भए। तेल अभिभको ‘होस्टेज स्क्वायर’मा पुगेका उनलाई प्रदर्शनकारीले स्वागत गरेका थिए।

नेतान्याहू सरकारले भने स्वतन्त्र आयोग गठनको माग स्वीकार गरेको छैन। सरकारले अघि सारेको वैकल्पिक प्रस्तावमा आयोगका आधा सदस्य सत्तारूढ गठबन्धन र बाँकी आधा विपक्षी सांसदले नियुक्त गर्ने व्यवस्था छ।

विपक्षी नेताहरूले राजनीतिक नेतृत्वबाट सदस्य नियुक्त गरिने यस्तो आयोग बहिष्कार गर्ने बताउँदै आएका छन्। यसले आक्रमणको छानबिन गर्ने आयोगको संरचना र स्वतन्त्रतामाथिको विवादलाई कायमै राखेको छ।

इजरायलमा मंगलबार अक्टोबर २७ मा संसदीय निर्वाचन हुँदैछ। निर्वाचनअघि सार्वजनिक भएका जनमत सर्वेक्षणले नेतान्याहू समर्थक गठबन्धन र आइजेनकोट नेतृत्वको विपक्षी समूहबीच कडा प्रतिस्पर्धाको संकेत गरेका छन्। एएफपीका अनुसार सर्वेक्षणमा कुनै पनि समूहले स्पष्ट संसदीय बहुमत प्राप्त गर्ने प्रक्षेपण देखिएको छैन।