बिग मुभिजको नयाँ अवतार, फोर के लेजरदेखि डल्बी एटमससम्म अन्तर्राष्ट्रियस्तरको सुविधा

काठमाण्डौ । नेपालमा आधुनिक मल्टिप्लेक्स संस्कृतिको सुरुआत गर्ने बिग मुभिजले आफ्ना सिनेमा हललाई व्यापक रूपमा स्तरोन्नति गर्दै अन्तर्राष्ट्रियस्तरका प्रविधि र सुविधा थपेको छ ।

काठमाडौंको कमलपोखरीस्थित सिटी सेन्टरमा रहेको बिग मुभिजले ‘Experience Cinema, Experience the Difference’ नारालाई थप प्रभावकारी बनाउने उद्देश्यसहित दृश्य, ध्वनि, सिटिङ र हलको समग्र वातावरणमा ठूलो लगानी गरेको जनाएको छ ।

कम्पनीका अनुसार हलमा अत्याधुनिक Barco 4K RGB Laser Projector जडान गरिएको छ । युरोपेली ब्रान्डको Barco SP4K-20C Series 4 स्मार्ट लेजर प्रोजेक्टरमा २१ हजार लुमेन्स ब्राइटनेस र 4K अर्थात् 4096×2160 नेटिभ रिजोलुसन उपलब्ध छ ।

चलचित्रका दृश्यलाई थप स्पष्ट, चम्किलो र जीवन्त बनाउन प्रोजेक्टरसँगै उच्च गुणस्तरको कलर रिप्रोडक्शन प्रविधि प्रयोग गरिएको छ । कम्पनीले ९८.५ प्रतिशतभन्दा बढी Rec. 2020/DCI-P3 कलर स्पेस सपोर्ट गर्ने प्रविधि जडान गरेको जनाएको छ ।

बिग मुभिजका विभिन्न हलमा १९×४३ फिट, २०×४३ फिट र २०×४६ फिट आकारका विशेष सिल्भर स्क्रिन राखिएका छन् ।

ध्वनि प्रणालीमा पनि कम्पनीले ठूलो स्तरोन्नति गरेको छ । हलमा Dolby Atmos 64-Channel System जडान गरिएको छ । यसले परम्परागत साउन्ड सिस्टमभन्दा फरक ढंगले प्रत्येक स्पिकरलाई स्वतन्त्र अडियो फिड उपलब्ध गराउने कम्पनीको भनाइ छ ।

हलको छत र चारैतर्फ राखिएका स्पिकर तथा CP850 साउन्ड प्रोसेसरको सहयोगमा १२८ वटासम्म साउन्ड अब्जेक्ट एकैपटक नियन्त्रण गर्न सकिने कम्पनीले जनाएको छ । विशेषगरी एक्सन तथा साउन्ड-इन्टेन्सिभ चलचित्रमा दर्शकले थप यथार्थपरक र इमर्सिभ ध्वनि अनुभव गर्न सक्नेछन् ।

हलका सिटलाई पनि थप आरामदायी बनाइएको छ । दर्शकका लागि प्रिमियम सिटिङअन्तर्गत २५५ वटा २२ इन्चका ‘Champion Series’ थिएटर चेयर राखिएका छन् । यी सिटमा एड्भान्स्ड एर्गोनोमिक्स, रिच ल्यामिनेटेड फेब्रिक तथा थ्री-पोजिसन लकिङ सुविधा उपलब्ध रहेको छ ।

थप विलासी अनुभवका लागि २९ वटा २९ इन्चका ‘Royal Luxuria’ ट्रिम कलर रिक्लाइनरसमेत जडान गरिएको छ ।

हलभित्र नयाँ कार्पेटिङ, अकुस्टिक वाल कभरिङ तथा आधुनिक लाइटिङ प्रणालीसमेत राखेर समग्र वातावरणलाई नयाँ स्वरूप दिइएको बिग मुभिजका अध्यक्ष राजेन्द्र अर्यालले जानकारी दिए ।

उनले व्यापक स्तरोन्नतिसँगै बिग मुभिजमा चलचित्र हेर्ने अनुभवलाई केवल पर्दामा दृश्य हेर्नेसम्म सीमित नराखी कथा र वातावरणलाई महसुस गर्ने तहमा पुर्‍याउने लक्ष्य राखिएको बताए ।

कम्पनीका अनुसार दर्शकले अब बिग मुभिजमा Picture, Sound, Comfort र Overall Cinema Experience का हिसाबले अझ उन्नत अनुभव लिन सक्नेछन् ।