राजधानीका पेट्रोल पम्पहरुमा लम्बेतान लाइन,पेट्रोल र डिजेलको अभाव हुन थाल्यो

NEWS
सोमबार, असार ३,२०८१ 14:00:30

काठमाण्डौ । नेपाल पेट्रोलियम ट्यांकर चालक संघको आन्दोलनका कारण राजधानीका निजी पेट्रोल पम्पहरु बन्द भएपछि सरकारी पेट्रोल पम्पहरुमा लामो लाइन लागेको छ ।

सरकारी स्वामित्वका सीमित पेट्रोल पम्पहरु मात्रै खुल्दा पम्प बाहिर आम सर्वसाधारणका लामो लाइन लागेको हो ।

अधिकांश निजी पेट्रोल पम्पहरुले पेट्रोलियम पदार्थको बिक्री वितरण बन्द गरेका छन् । नेपाली सेना र नक्शालस्थित नेपाल प्रहरीको पेट्रोल पम्पबाट भने बिक्री भइरहेको छ । यी पेट्रोल पम्पहरुमा बिहानैदेखि सर्वसाधारणको घुइँचो लागेको छ ।

यस्तोमा काठमाण्डौको भद्रकालीमा नेपाली सेनाद्वारा सञ्चालित रिपुमर्दिनी पेट्रोल पम्पमा पनि पेट्रोल र डिजेल अभाव भएको छ । पेट्रोल र डिजेल अभाव भएपछि आम सर्वसाधारण समस्यामा परेका छन् ।

चालक संघको आन्दोलनका कारण सर्वसाधारणले सास्ती भोगिरहेको र यसले दैनिक जीवन नै प्रभावित बनिरहेको आम सर्वसाधारणले गुनासो गरेका छन् । बढ्दो गर्मीमा लामो समयसम्म लाइनमा लाग्दा निकै कठिनाईको सामना गरिरहनु परेको उनीहरुले बताएका छन् ।