मातृभूमि लघुवित्तको २ दिने राष्ट्रिय सम्मेलन सम्पन्न, ३४ जना कर्मचारीलाई नगद पुरस्कार

काठमाण्डौ । मातृभूमि लघुवित्त वित्तीय संस्था लिमिटेडले २ दिने राष्ट्रिय सम्मेलन सम्पन्न

सम्पन्न गरेको छ । संस्थाले भदौ ३० र ३१ गते …Unveiling The Vision: A Transformative Journey With Quality Assurance  नामक राष्ट्रियस्तरको सम्मेलन तिलोत्तमा रुपन्देहीमा सम्पन्न गरेको हो ।  

दुई दिने उक्त सम्मलेलनमा संस्थाको सञ्चालक समितिका अध्यक्ष, सञ्चालकहरु, उच्च व्यवस्थापन, विभागीय प्रमुख, अनुगमन प्रमुख तथा देशभरीकै २३६ वटा शाखाका शाखा प्रबन्धकहरुको उपस्थिति रहेको थियो । सम्मेलनको समुद्घाटन संस्थाका अध्यक्ष लोकराज शर्माले गरेका थिए ।  

कार्यक्रमको समुदघाटन गर्दै संस्थाका अध्यक्ष लोकराज शर्माले मर्जर पश्चात संस्था देशकै ठूलो लघुवित्त संस्थाहरु मध्येको एक बन्न पुगेका र आगामी दिनमा संस्था देशकै पृथक, अग्रेणी एवं अब्बल बन्ने विश्वास व्यक्त गरे ।  

 उक्त सम्मेलनमा संस्थाका व्यवसायका विभिन्न सूचकहरुमा उत्कृष्ठ कार्य सम्पादन गर्ने ३४ जना कर्मचारीहरुलाई नगद र प्रमाणपत्र सहित पुरस्कृत गरिएको थियो । सम्मेलनमा संस्थाका प्रमुख कार्यकारी अधिकृतले संस्थाको आगामी यात्राको भिजन पेपर प्रस्तुतिकरण गरेका थिए ।  

साविकको किसान लघुवित्त वित्तीय संस्था लिमिटेड र साविकको जाल्पा सामुदायिक लघुवित्त वित्तीय संस्था लिमिटेड एक आपसमा गाभिएर मातृभूमि लघुवित्त वित्तीय संस्था लिमिटेडको नामबाट २०८१ असार २७ गतेदेखि एकिकृत वित्तीय कारोवार शुभारम्भ गरेको थियो । मर्ज पछि साविकका संस्थाहरुमा कार्यरत कर्मचारीहरुबीच एकआपसमा चिनजान एवं घुलमिल गराउन, कर्मचारीको हौसला बढाउन, काम गर्ने तौरतरिकामा एकरुपता कायम गर्दै द्विविधाहरुलाई समाधान गर्न र साविकका दुई संस्थाको संस्थागत संस्कृतिलाई मिश्रण गर्ने उद्देश्यले उक्त बृहत सम्मेलनको आयोजना गरिएको संस्थाले जनाएको छ । सम्मेलनमा २५ बुँदे प्रतिवद्धता पत्रजारी गरिएको थियो । उक्त कार्यक्रम संस्थाका नायब प्रमुख कार्यकारी अधिकृत सजल खड्काले सञ्चालन गरेका थिए ।  

कम्पनीको चुक्तापुँजी ६२ करोड ८३ लाख ५७ हजार पुगेको छ । कम्पनीले निकट भविष्यमा नै ११ करोड ४९ लाख ९८ हजार रुपैयाँबराबरको थप सार्वजनिक निष्काशन गर्ने प्रक्रिया अगाडि बढाएको छ । सो पश्चात कम्पनीको चुक्तापूँजी ७४ करोड ३३ लाख ५५ हजार पुग्नेछ ।  

 लम्कीचुहा नगरपालिका–४ बलिया, कैलालीमा केन्द्रीय कार्यालय रहेको मातृभूमि लघुवित्त वित्तीय संस्था लिमिटेडको कर्पोट कार्यालय, बुढानिलकण्ठ, काठमाडौमा रहेको छ ।