नेपालले बंगलादेशलाई ४० मेगावाट विद्युत बिक्री गर्ने सम्झौता, वार्षिक ९.२ मिलियन डलर आम्दानी हुने

काठमाण्डौ । नेपाल र बंगलादेशबीच ४० मेगावाट बिजुली बिक्री सम्झौता भएको छ । नेपाल विद्यत् प्राधिकरण, भारतको एनटीपीसी विद्युत् व्यापार निगम (एनभीभीएन) र बंगलादेशको बंगलादेश पावर डेभलपमेन्ट बोर्ड (बीपीडीबी)बीच आज त्रिपक्षीय सम्झौता भएको हो ।  

उक्त सम्झौता आज काठमाण्डौको होटल याक एण्ड यती होटलमा एक कार्यक्रमका बीच सम्पन्न भएको हो । उक्त सम्झौता नेपालका तर्फबाट ऊर्जा, जलस्रोत तथा सिँचाइमन्त्री दीपक खड्का र बंगलादेशका अन्तरिम सरकारका वातावरण, वन तथा जलवायु परिवर्तन र जलस्रोतमन्त्री सैयदा रिजवाना हसनको उपस्थितिमा भएको थियो ।  

सम्झौतापत्रमा प्राधिकरणका कार्यकारी निर्देशक कुलमान घिसिङ, एनभीभीएनका प्रमुख कार्यकारी अधिकृत रेणु नाराङ र बीपीडीबीका अध्यक्ष मोहमद रिजाउल करिमले हस्ताक्षर गरेका थिए । सम्झौताअनुसार प्रारम्भिक चरणमा बंगलालादेशले नोपलबाट  प्रतियुनिट ६.४ सेन्टमा ४० मेगावाट बिजुली आपूर्ति गर्नेछ । आपूर्ति प्रणाली व्यवस्थापनमा भने भारतीय पक्षले आवश्यक सहयोग गर्नेछ ।  

नेपालबाट भारतीय अनुदानमा निर्माण भएको तथा नेपाल विद्युत प्राधिकरणको स्वामित्वमा रहेको २५ मेगावाटको त्रिशूली र सहायक कम्पनीमार्फत निर्माण गरिएको २२ मेगावाटको चिलिमे जलविद्युत आयोजनाहरुबाट उत्पादित विद्युत बंगलादेश निर्यात हुनेछ।

यी दुवै आयोजनाले भारतमा विद्युत निर्यातका लागि स्वीकृति पाइसकेका छन् ।  

सम्झौताअनुसार विद्युत आयात प्रत्येक वर्षको जुन १५ देखि नोभेम्बर १५ सम्म कायम रहनेछ । बंगलादेशमा नेपालबाट विद्युत नेपाल–भारत ढल्केबर–मुजफ्फरपुर क्रस बोर्डर ट्रान्समिसन लाइन र भारत–बंगलादेश–बरामपुर–भेरमारा क्रस बोर्डर ट्रान्समिसन लाइनमार्फत प्रवाह गरिने छ ।

यो सम्झौताबाट नेपालले वार्षिक ९.२ मिलियन अमेरिकी डलर बराबरको वार्षिक आम्दानी हुने जनाइएको छ ।