राष्ट्रबैंकले यो वर्ष धनतेरसको दिन मात्रै सुनका असर्फी बेच्ने, मूल्य पनि सोही दिन तोक्ने

काठमाण्डौ । तिहारअघि आउने धनतेरसको दिन सुनचाँदीजस्ता बहुमूल्य धातु वा त्यसबाट बनेको गरगहना, सामान भित्र्याउने चलन नेपालमा समेत तीव्र रुपमा बढिरहेको छ । यसैलाई मध्यनजर गर्दै नेपाल राष्ट्रबैंकले सुनचाँदीबाट बनेका असर्फी, स्मारिका सिक्का तथा मेडालियनको नयाँ बिक्रीमूल्य कायम गर्दै यसपटक बिक्री गरिने दिनहरु समेत तोकिदिएको छ ।  

नेपाल राष्ट्रबैंकको मुद्रा व्यवस्थापन विभाग, टक्सार महाशाखाले एक सूचना जारी गर्दै सुनको असर्फी र चाँदीका स्मारिका तथा मेडालियन खरीद गर्न पाइने दिन र समयको सूची सार्वजनिक गरेको हो । जसअनुसार सुनको असर्फी यो वर्ष एकदिन मात्र खरीद गर्न पाइनेछ । केन्द्रीय बैंकसँग रहेको मौज्दात असर्फी २.५ ग्राम प्रति व्यक्ति एकथानका दरले पहिलो आउनेलाई प्राथमिकताको नीतिअनुसार कात्तिक १३ गते(धनतेरस)को दिन बिहान ११ बजेदेखि बिक्री खुल्ला हुनेछ । मौज्दात कायम रहेमा अपरान्ह ४ बजेसम्म सुनका असर्फी खरीद गर्न पाइनेछ । 

चाँदीको स्मारिका तथा मेडालियन चाहिँ कात्तिक ११ गतेदेखि १४ गतेसम्म बिहान ११ बजेदेखि अपरान्ह ४ बजेसम्म प्रतिव्यक्ति बढीमा पाँच थानसम्म(गाई अंकित २५ ग्राम, गाई अंकित १० ग्राम, लक्ष्मी अंकित १० ग्राम, गणेश अंकित १० ग्राम र गजलक्ष्मी अंकित १० ग्राममध्येबाट) बिक्री गरिनेछ ।  

असर्फी, चाँदीका स्मारिका र मेडालियन खरीदका लागि अनिवार्य रुपमा सक्कल नागरिकता वा सो खुल्ने प्रमाण र सोको प्रतिलिपिसहित उपस्थित हुनुपर्ने भनिएको छ ।  

असर्फी वा मेडालियन खरीदका लागि नगद वा क्यूआरमार्फत समेत भुक्तानी गर्न सकिने केन्द्रीय बैंकले जनाएको छ । 

सुनको असर्फीको दररेट दैनिक रुपमा निर्धारण हुने भएकोले कात्तिक १३ गते ११ बजे पछि मात्र महाशाखाबाट बिक्री हुने बताइएको छ ।  

यसैबीच, केन्द्रीय बैंकले चाँदीको स्मारिका सिक्का र मेडालियनको नयाँ बिक्री मूल्य पनि सार्वजनिक गरेको छ । कात्तिक ६ गतेको निर्णयअनुसार चाँदीका स्मारिका सिक्का र मेडालियनको बिक्रीमूल्य कायम गरी सार्वजनिक भएको हो ।  

केन्द्रीय बैंकबाट सार्वजनिक नयाँ मूल्यसूची यसप्रकार छः