टिकटकका संस्थापक बने चीनको सबैभन्दा धनी व्यक्ति

काठमाण्डौ । चर्चित चिनियाँ एप टिकटकको माउ कम्पनी बाइट डान्सका मालिक चीनको सबैभन्दा धनी व्यक्ति बन्न सफल भएका छन् । हुरच चाइना लिस्टका अनुसार बाइट डान्सका संस्थापक झांग यिमिङ चीनकै धनाढ्य व्यक्ति बनेका हुन् ।  

यिमिङको सम्पत्ति एक वर्षमा ४३ प्रतिशतले वृद्धि भएको छ । यो वृद्धिका साथ उनको कुल सम्पत्ति ४९.३ अर्ब डलर पुगेको छ । यिमिङले सन् २०२१ मा बाइटडान्सको मुख्य कार्यकारी अधिकारीको पदबाट राजीनामा दिएका थिए ।  

बाइटडान्सले गत वर्ष ११० अर्ब डलरबराबरको आम्दानी गरेको थियो । तथापी कम्पनीले यस क्रममा कयौंपटक अमेरिकी कानूनी चुनौतिहरुको सामना गर्नु परेको थियो । बाइटडान्सले हुरन लिस्टमा चीनको सबैभन्दा मूल्यवान शीर्ष ५०० कम्पनीमध्ये ५ औं स्थान ओगटेको छ ।  

बाइटडान्सका संस्थापक यिमिङले झोङ शानशानलाई पछि पार्दै चीनको शीर्ष धनाढ्यको उपाधि आफ्नो नाम गरेका हुन् । शानशानको सम्पत्ति २४ प्रतिशतले घटेर ४७.९ बिलियन डलरमा झरेको छ । कुनैबेला चीनको सबैभन्दा धनी व्यक्तिका रुपमा रहेका ज्याकमा युनको सम्पत्ति भने ३ प्रतिशतले घटेर २३.२ अर्ब डलरमा सीमित बनेको छ । यो गिरावटका साथ उनी चीनको १० औं धनी व्यक्तिको रुपमा रहेका छन् ।