नेप्सेको सपोर्ट जोनमा बन्यो ‘डोजी स्टार’, के होला अब बजार ?

काठमाण्डौ । आज दिनभर सामान्य उतारचढाव भएको सेयर बजार अन्तिम समयमा झिनो अंकले बढेर बन्द भएको छ । प्राविधिक रुपमा आजको बजारलाई हेर्दा २ दिन लगातार घटेको नेप्सेको सपोर्ट जोनमा डोजी स्टार बनेको देखिन्छ ।  

सेयर तथा सूचकको सुरु र अन्तिम मूल्य एउटै भएर तल–माथि लामो धागो बनेको खण्डमा डोजी क्याण्डल बन्ने गर्छ । यसबाट बजारमा विस्तारै आपूर्ति कमजोर हुँदै गरेको तथ्यलाई संकेत गर्छ । यो भनेको अनिर्णयको क्याण्डल पनि हो ।  

माथिको लामो धागोले बिक्रीकर्ता बजारमा अझै रहेको बुझिन्छ भने तलको लामो धागोले खरिदकर्ता हाबी हुँदै गरेको बुझिन्छ । आगामी कारोबारमा यदि बजार आजको उच्च विन्दु २६५० भन्दा माथि लागेमा सम्भावित रुपमा अप ट्रेन्ड र आजको न्यून विन्दु २६११ भन्दा तल लागेमा बजारमा डाउन ट्रेण्ड लागेको मानिने छ  ।  

बजारलाई भोल्युममार्फत हेर्दा आज भोल्युम ड्राई भएको छ । यसले पनि आज बिक्रीकर्ता पछि हटेको बुझिन्छ । बजारलाई बोलिङ्गर ब्यान्डमार्फत हेर्दा तल्लो ब्याण्डमा डोजी स्टार बनेको देखिन्छ ।  

डेली बेसमा आरएसआई ४० को तहमा रहेको देखिन्छ । समग्रमा सबै इन्डिकेटरबाट नियाल्दा आज बजार बोलिङ्गरको तल्लो ब्याण्डमा सम्हालिन खोजेको देखिन्छ । तर यसको निश्चिताको लागि भने अझै एउटा कारोबार नियाल्नु पर्ने देखिन्छ ।  

नोटः सेयर बजारमा लगानी जोखिमपूर्ण हुन्छ। यो विश्लेषण कारोबरको लागि सिफारिस भने होइन ।