यी ८ कम्पनीको लाभांश सुरक्षित गर्ने आज अन्तिम दिन

काठमाण्डौ । नेपाल स्टक एक्सचेञ्ज(नेप्से)मा सूचीकृत ८ वटा कम्पनीको लाभांश सुरक्षित गर्ने आज अन्तिम दिन रहेको छ । आज हिमालयन डिष्टिलरी, मेरो माइक्रोफाइनान्स, कालिका लघुवित्त, कालिका पावर, बोटलर्स नेपाल(तराई)लिमिटेड, सूर्योदय वोमी लघुवित्त,श्री इन्भेष्टमेन्ट एण्ड फाइनान्स र लुम्बिनी विकास बैंकको लाभांश सुरक्षित गर्ने अन्तिम दिन रहेको हो ।  

यी कम्पनीहरुमध्ये सूर्योदय वोमी लघुवित्त बाहेक अन्यले पुस १९ गते बुक क्लोज गर्दैछन् । सूर्योदय वोमी लघुवित्तले भने पुस २१ गते बुक क्लोज गर्दैछ । पुस १९ र २० गते शुक्रबार र शनिबार परेकाले सेयर कारोबार हुनेछैन । यसर्थ आजसम्म नेप्सेमा कारोबार भई कायम भएका सेयरधनीहरु मात्रै यी कम्पनीद्वारा प्रस्तावित लाभांश पाउन र सभामा सहभागी हुनका लागि योग्य हुनेछन् ।  

हिमालयन डिष्टिलरीले आव २०८०/८१ सम्मको कम्पनीको सञ्चित मुनाफा समेतबाट कम्पनीको हाल कायम चुक्तापूँजीको १५ प्रतिशत बोनस सेयर र ५ प्रतिशत नगद लाभांश(कर प्रयोजनका लागि समेत) गरी कुल २० प्रतिशत लाभांश प्रदान गर्ने निर्णय गरेको छ । यो लाभांश कम्पनीको आगामी पुस २८ गते विरगञ्जमा रहेको कम्पनीको रजिष्टर्ड कार्यालयमा आयोजना हुने २४ औं साधारण सभाबाट पारित गरी वितरण गरिनेछ ।  

मेरो माइक्रोफाइनान्सले पनि गत आवकालागि ७.५ प्रतिशत बोनस सेयर र कर प्रयोजनका लागि ०.३९४७ प्रतिशत नगद लाभांशको प्रस्ताव गरेको छ । कम्पनीको यो लाभांश आगामी माघ ४ गते आयोजना हुने साधारण सभाबाट अनुमोदन हुनेछ ।  

यस्तै कालिका लघुवित्तले गत आवका लागि सेयरधनीहरुलाई कुल १० प्रतिशत लाभांशको घोषणा गरेको छ । कुल लाभांशमा ९.५० प्रतिशत बोनस सेयर र ०.५० प्रतिशत नगद लाभांश रहेको छ । संस्थाले लाभांश पारित गर्न पुस २९ गते पोखरामा रहेको होटल टाक्स इन्टरनेसनलमा सभा डाकेको छ ।  

कालिका पावरले आव २०८०/८१ सम्मको कम्पनीको सञ्चित मुनाफासमेत बाट कम्पनीका सेयरधनीहरुलाई चुक्ता पूँजीको ७ प्रतिशत बोनर सेयर र कर प्रयोजनको लागि ०.३६८४ प्रतिशतले हुन आउने नगद लाभांश प्रदान गर्ने निर्णय गरेको छ । संस्थाले आफ्नो १७ औं साधारण सभा आगामी पुस २९ गते चितवनमा रहेको दियालो फुडल्याण्डमा आयोजना गर्दैछ ।  

बोटलर्स नेपाल(तराई)लिमिटेडले ५० प्रतिशत अर्थात प्रति साधारण कित्ता ५० रुपैयाँका दरले नगद लाभांश प्रदान गर्ने निर्णय गरेको छ । प्रस्तावित लाभांश कम्पनीको आगामी पुस २६ गते आयोजना हुने साधारण सभाबाट अनुमोदन गरी सेयरधनीहरुलाई वितरण गरिनेछ ।  

सूर्योदय वोमी लघुवित्तले हाल कायम चुक्तापूँजीको ६ प्रतिशत बोनस सेयर र  ०.९६२३५०५ प्रतिशत नगद लाभांश प्रदान गर्ने निर्णय गरेको छ । संस्थाले ललितपुरमा रहेको लुभु पार्टी प्यालेसमा पुस २८ गते साधारण सभा आयोजना गर्दैछ ।  

श्री इन्भेष्टमेन्ट एण्ड फाइनान्सले गत आवको मुनाफाबाट विद्यमान चुक्तापूँजीको १.८६५९ प्रतिशत बोनस सेयर र कर प्रयोजनका लागि ०.०९८२ प्रतिशत नगद लाभांश गरी कुल १.९६४१ प्रतिशत लाभांश घोषणा गरेको छ । कम्पनीको साधारण सभा पुस २९ गते आयोजना हुँदैछ ।  

यस्तै लुम्बिनी विकास बैंकले आर्थिक वर्ष २०८०/८१ को मुनाफा तथा सञ्चित मुनाफाबाट सेयरधनीलाई हाल कायम चुक्तापूँजीको ४ प्रतिशत नगद लाभांश(करसहित) र ३ प्रतिशत बोनस सेयर गरी कुल ७ प्रतिशत लाभांश वितरणको प्रस्ताव गरेको छ । बैंकको साधारण सभा पुस २९ गते आयोजना हुँदैछ र उक्त सभाबाट लाभांशको प्रस्ताव पारित हुनेछ ।