पूर्ण रुपमा ईभी कार अपनाउने विश्वकै पहिलो देश बन्दै नर्वे, बिक्री भएका १० कारमध्ये ९ वटा ईभी

काठमाण्डौ । ईभी कार प्रयोगको विषयमा नर्वे विश्वकै अग्रेणी देश हो । गत वर्ष नर्वेमा बिक्री भएका १० वटा नयाँ सवारीमध्ये ९ वटा ईभी थिए ।  

विगत ७५ वर्षभन्दा बढी समयदेखि भोल्सवागेनको सवारी साधन आयात गरिरहेको ओस्लोमा आधारित कम्पनी हाराल्ड ए मोलेरले सन् २०२४ देखि इन्धनमा आधारित कारहरुलाई पूर्ण रुपमा बिदाई गरेको छ । अहिले यो कम्पनीको सोरुममा बिक्रीमा राखिएका सबै सवारी साधन विद्युतीय छन् ।  

नर्वेको राजधानी ओस्लोमा अधिकांश ईभी कार देखिन्छन् । ५५ लाख मानिस बसोवास गर्ने नर्वेमा अन्य देशको तुलनामा ईभी सवारीलाई तीव्र गतिमा अपनाइएको छ । यस्तै नर्वे इन्धनमा आधारित कार पूर्ण रुपमा विस्थापित गर्ने विश्कै पहिलो देश बन्ने बाटोतर्फ अग्रसर भएको छ ।  

गत वर्ष नर्वेका सडकमा गुड्ने ईभी कारले पहिलोपटक इन्धन कारको संख्यालाई उछिनेको थियो । नर्वेमा गुड्ने कुल कारको संख्यामा एक तिहाई हिस्सा ईभी कारको रहेको छ ।  

यस्तै गत वर्ष बिक्री भएको कुल कारमा ८८.९ प्रतिशत कार ईभी थिए । सन् २०२३ मा यो संख्या ८२.४ प्रतिशत थियो ।  

केही महिना त पूर्ण ईभी कारको बिक्री ९८ प्रतिशत पुगेको नर्वेको सडक विभागले जनाएको छ । नर्वेको सवारी साधनमा विद्युतीकरणको क्रान्ति एकैपटक भएको भने हाइन । यसका लागि ३ दशक लागेको छ ।  

युरोपेली युनियनले सन् २०३५ सम्म इन्धनमा आधारित कारको बिक्रीलाइ्र्र प्रतिबन्ध लगाउने योजना बनाएको छ । यस्तै बेलायतले पनि सन् २०३० मा इन्धनजन्य सवारी साधनमा प्रतिबन्ध लगाउने योजना बनाएको छ ।  

नर्वेमा अहिले पनि पेट्रोल र डिजेल कार खरिद गर्न पाइन्छ तर कम ग्राहकले मात्रै खरिद गरिरहेका छन् ।