कालिका लघुवित्तको नाफा १३४% ले बढ्यो, वितरणयोग्य मुनाफा र ईपीएस कति ?

काठमाण्डौ । कालिका लघुवित्तले नाफा १३४.८८ प्रतिशतले बढेको छ । संस्थाले चालु आवको दोस्रो त्रैमाससम्ममा ४ करोड २१ लाख रुपैयाँ खुद नाफा कमाएको छ । अघिल्लो आवको सोही अवधिसम्म भने संस्थाले १ करोड ७९ लाख रुपैयाँबराबरको खुद नाफा आर्जन गरेको थियो ।  

संस्थाको खुद ब्याज आम्दानी पनि ४६.१० प्रतिशतले बढेर १७ करोड ८ लाख रुपैयाँ पुगेको छ । अघिल्लो आवमा यो रकम ११ करोड ६९ लाख रुपैयाँ थियो । संस्थाले २ करोड ७८ लाख रुपैयाँबराबरको अन्य सञ्चालन आम्दानी गरेको छ । 

संस्थाको खुद सञ्चालन आम्दानी ४१.७० प्रतिशतले वृद्धि भएर १९ करोड ३५ लाख रुपैयाँ पुगेको छ । यस्तै सञ्चालन खर्च २०.२७ प्रतिशतले बढेर १३ करोड ३३ लाख रुपैयाँ पुगेको छ ।  

४० करोड ७६ लाख रुपैयाँ चुक्तापूँजी भएको संस्थाको रिटेन्ड अर्निङ २७.६६ प्रतिशतले घटेर २ करोड ८४ लाख रुपैयाँ र रिजर्भ भने ५.९८ प्रतिशतले बढेर २६ करोड १९ लाख रुपैयाँ पुगेको छ ।  

संस्थाको निक्षेप संकलन १ अर्ब ५१ करोड र कर्जा प्रवाह ४ अर्ब ४७ करोड रुपैयाँ रहेको छ । दोस्रो त्रैमाससम्म संस्थाले खराब कर्जा अनुपात घटाएको छ । अघिल्लो आवसम्म ४.८२ प्रतिशत रहेको खराब कर्जा अनुपात घटेर ४.६७ प्रतिशत कायम भएको छ ।  

समीक्षा अवधिसम्म संस्थाको वितरणयोग्य मुनाफा २ करोड ६३ लाख र वार्षिक वितरणयोग्य प्रतिसेयर आम्दानी १२.९३ रुपैयाँ रहेको छ ।  

यस्तै संस्थाको प्रतिसेयर आम्दानी २०.६८ रुपैयाँ रहेको संस्थाको प्रतिसेयर नेटवर्थ १७१.२४ रुपैयाँ,मूल्य आम्दानी अनुपात ४९.३७ गुणा,प्रतिसेयर कुल सम्पत्तिको मूल्य १ हजार १६३.३१ रुपैयाँ र तरलता अनुपात ९.३६ प्रतिशत रहेको छ ।