ट्रम्पले बनाए भारतीय मूलका काश पटेललाई एफबीआईको निर्देशक

काठमाण्डौ । अमेरिकी राष्ट्रपति डोनाल्ड ट्रम्पले भारतीय मूलका काश पटेललाई फेडरल ब्यूरो अफ इन्भेस्टिगेशन(एफबीआई)को निर्देशकमा नियुक्त गरेका छन् ।

काश पटेलले यस नियुक्तिको लागि राष्ट्रपति ट्रम्पलाई धन्यवाद दिएका छन्। ‘म एफबीआईको नवौं निर्देशक बन्न पाउँदा सम्मानित छु। म राष्ट्रपति ट्रम्प र महान्यायाधिवक्ता बोन्डीले मलाई विश्वास गरेकोमा धन्यवाद दिन्छु’ उनले ट्वीटरमा लेखेका छन् ।  

रिपब्लिकन पार्टीका दुई सांसद सुसान कोलिन्स र लिसा मुर्कोस्कीसहित डेमोक्र्याटिक पार्टीका सबै सांसदहरूले काश पटेलको नियुक्तिको विपक्षमा मतदान गरेका थिए।

काश पटेलले ट्रम्पको पहिलो कार्यकालमा ट्रम्पसँग काम गरेका थिए। ४४ वर्षीय काश पटेलले आफ्नो करियर वकिलको रुपमा सुरु गरेका थिए । उनले हत्या, लागुऔषध र जटिल आर्थिक अपराधका मुद्दामा अदालतमा बहस गरेका थिए ।

अमेरिकी रक्षा मन्त्रालयका अनुसार काश पटेलले अमेरिकी कार्यवाहक रक्षा सचिव क्रिस्टोफर मिलरको चीफ अफ स्टाफको रूपमा काम गरेका छन्। उनी राष्ट्रिय सुरक्षा परिषद्मा राष्ट्रपतिका सहायक सहायक र काउन्टर टेररिज्म विभागका वरिष्ठ निर्देशक भइसकेका छन् ।