ग्राउण्ड जिरोका लगानीकर्ताहरु अन्यौलमा, भन्छन् ‘राजनीति पूर्व राजाले र सेयर बजार महाराजाले गिजोल्दै छन्’

काठमाण्डौ । सधैंको साता जस्तै आजपनि हामीले नियमित स्तम्भ ‘ग्राउण्ड जिरो’लाई निरन्तरता दिएका छौं । यस क्रममा आज हामीले ज्ञानेश्वर र कमलादी आसपासका ब्रोकर हाउसहरुमा पुगेर लगानीकर्ताहरुको बिचार बुझ्ने र सुन्ने प्रयास गरेका छौं ।

सबैभन्दा पहिले आज हामी बिहान ११ बज्दा नबज्दै ज्ञानेश्वरमा रहेको सूमेरु सेक्यूरिटिज (स्टक ब्रोकर नम्बर ३९) मा पुगेका थियौं । बिहानी सत्र भएकाले यस ब्रोकरमा लगानीकर्ताहरु आउने क्रम जारी थियो । आज बजार खुलेदेखि नै ओरालो लागेको थियो । यतिकैमा एक लगानीकर्ता, ‘घटेको बेलामा नै सेयर किन्नु पर्छ’ भन्दै उठेर एचआरएलको सेयर किन्न ब्रोकरलाई आदेश दिए । उनले भने, ‘मैले त किनेको किनै छु साथीहरु !’ त्यही रहेका अर्का एक लगानीकर्ताले बजारले  २६६० विन्दुमा बलियो सपोर्ट लिने तर्क गरे । उनले यो विन्दुमा बजारको बलियो सपोर्ट रहेको र यसो नभए बजार २६३० विन्दुसम्म आउन सक्ने आँकलन गरे ।  

उनी सँगै बसेका लगानीकर्ताले भने, ‘यो टेक्निकलले काम गर्दैन है साथीहरु ।’ उनलाई जवाल दिँदै अर्का एक लगानीकर्ताले भने, ‘तपाईले नबुझेर हो, बुझे काम गर्छ । यसले ठ्याक्कै काम गर्ने भन्दा पनि सम्भावनाको विषय हो ।’  

यसै ब्रोकरमा भेटिएका एक लगानीकर्ताले सिन्धु विकास बैंकमा खेलाडी लागि परेको दाबी गरे । उनको कुरा सेनेपनि सँगैका लगानीकर्ताले भने ‘अहिले राजनीति पूर्व राजाले गिजोल्दै छन् अनि सेयर बजार महाराजाले ।’ उनको कुरा सुनेपछि ब्रोकर हाउसमा हाँसो गुञ्जियो । केही लगानीकर्ताले आगामी १५ गते राजनीतिक दलहरुको भिडन्तको हल्लाले घटेको पनि दाबी गरे । यीनै मध्येका एक जनाले यो साता बजार साइडवेज चल्न सक्ने अनुमान गरे । ‘आज ठूलो अंकले घट्यो भने त सम्हालिन पनि सक्छ, ’उनले भने । ब्रोकर हाउसमा यस्तै वार्तालाप चल्दै थिए । १२ बजेसम्म बजार सामान्य अंकले घट्दै थियो ।

यहाँबाट हामी सिटी सेन्टरस्थित नयाँ ब्रोकर गरिमा सेक्यूरिटिज (स्टक ब्रोकर नम्बर ७८) मा पुग्यौं । यसबेलासम्म बजार २५ अंकले घटको थियो । यस ब्रोकरमा खासै लगानीकर्ता थिएनन् । एक लगानीकर्ता बजार हेरेर फोनमा कुरा गर्न मस्त थिए । ‘लौ ! बर्बाद भयो । बजार यसरी घट्ला भन्ने लागेको थिएन,’ उनले घटेको बजार मोबाइलमा हेर्दै भने । यस ब्रोकरमा हामीले सञ्चालकसँग पनि बजारको विषयमा जिज्ञासा राख्यौं । ब्रोकर सञ्चाकले राजनीतिक अन्यौलताले बजार घटेको प्रतिक्रिया दिए ।  

यहाँबाट हामी क्रियटिभ सेक्यूरिटिज (स्टक ब्रोकर नम्बर ४०) मा पुग्यौं । यस ब्रोकरमा केही लगानीकर्ता बजार हेरेर टोलाएर बसेका देखिन्थे । यसै ब्रोकरमा भेटिएकी एक महिला लगानीकर्ताले बजार घटेको प्रति आश्चर्य प्रकट गर्दै आफूले बजार यसरी घट्ला भनेर नसोचेको बताइन् । उनीसँगै बसेका एक लगानीकर्ताले बजार २६ सय आसपास अर्थात २५८० विन्दुभन्दा तल नजाने दाबी गरे । यस ब्रोकरमा भेटिएका लगानीकर्ताले उनको भनाइसँग सहमती जनाउदै बजार धेरै दिन घटेको कारण अब केही अंक गुमाएर फर्किने दाबी गरे । यस बेलासम्म भित्ताको घडिमा १ बजिसकेको थियो । बजार एकोहोरो घटेको थियो भने लगानीकर्ताहरु आत्तिएका जस्ता देखिन्थे ।  

यहाँबाट हामी कमलादीमा रहेको कोहिनूर सेक्यूरिटिज (स्टक ब्रोकर नम्बर ३५) मा पुग्यौं । यस ब्रोकरमा पनि लगानीकर्ता निकै कम देखिए । बजार एकोहोरो घटिरहेको थियो । यसै ब्रोकरमा भेटिएका एक लगानीकर्ताले भने, ‘लौ ! साथीहरु बजारमा राजनीतिक र चैत दुबै लाग्यो । बजार १५ गतेसम्म यसैगरी पनि चल्न सक्छ । त्यसपछि भने बजारको आगामी यात्रा थाहा होला ।  

आज २ बजेपछि बजारमा झनै तीव्र गिरावट आएको थियो । अधिकांश ब्रोकरहरुमा लगानीकर्ता र ब्रोकर सञ्चालकहरुमा पनि बजारप्रति अन्यौलता रहेको देखिन्थ्यो । यद्यपी लागनीकर्ताहरु तीव्र घटेको बजारले फेरि गति लिने झिनो आशामा देखिन्थे ।