सामाजिक सञ्जालमा लगानीकर्ता भन्छन् ‘सरकारमा स्वार्थ समूह सक्रिय हुँदा गभर्नर नियुक्तिमा ढिलाई’

काठमाण्डौ ।   साताको पहिलो कारोबार दिन आज राम नवमीको कारण सेयर बजार बन्द रहेको छ । यही कारण आज हामीले नियमित स्तम्भ ग्राउण्ड जिरोअन्तर्गत लगानीकर्ताहरुको बिचार सामाजिक सञ्जालबाट लिने प्रयास गरेका छौं ।  

आज सेयर बजार बन्द रहदा लगानीकर्ताहरु पनि सामाजिक सञ्जालमा फुसर्दिला देखिन्छन् । आज पनि बजारमा लगानीकर्ताहरु बीच गभर्नर नियुक्तिकै विषयले  स्थान पाएको देखिन्छ । अहिले पूँजीबजार लगायत समग्र अर्थतन्त्र नै नयाँ गभरर्नको प्रतिक्षामा रहेको देखिन्छ । सरकारले एक महिना पहिले नै नियुक्ति गर्नुपर्ने गभर्नर समयमा नै नियुक्त गर्न नसक्दा समाजिक सञ्जालदेखि विभिन्न माध्यमबाट सरकारको आलोचना सुरु भएको छ ।  

नयाँ आउने गभर्नरका विषयमा लगानीकर्ताहरुले आ–आफ्नै धारणा बनाएको देखिन्छ । केहीले गभर्नरमा युवराज खतिवडा नै दोहोरिन सक्ने तर्क पनि गरेका छन् । केहीले भने अर्थमन्त्री भईसकेको व्यक्ति गभर्नर नहुने तर्क पनि गरेको सुनिन्छ । समाजिक सञ्जालमा एक लगानीकर्ताले युवराज खतिवडा गभर्नर बने लगानीकर्ताले अर्थतन्त्र र पूँजीबजार दुवै क्षेत्रको लागि राम्रो हुने तर्क राखेका छन् ।  

केही लगानीकर्ताहरुले भने कुनैपनि पार्टीको सिफारिसबाट आएको गभर्नरले समग्र अर्थतन्त्र र पूँजीबजारलाई सम्बोधन गर्न नसक्ने दाबी गरेका छन् । यस्तै अर्काथरी लगानीकर्ताहरुले गभर्नर जुनसुकै पार्टीको सिफारिसमा आए ता पनि अर्थतन्त्र बुझेको र कुर्चिमा बसेपछि सबै क्षेत्रलाई समेट्न सक्ने निष्पक्ष रुपमा काम गर्ने व्यक्ति आउनु पर्ने तर्क गरेका छन् ।  

सामाजिक सञ्जालमा एक लगानीकर्ताले लेख्छन्  ‘महाप्रसाद जानु नै सेयर बजारको लागि समधान हो । अब सेयर बजारले गति लिन्छ। ’ उनलाई जवाफ दिँदै एक लगानीकर्ता लेख्छन्, ‘के रहेछ समस्या अब आउने दिनमा थाहा होला । ’

केही लगानीकर्ताले भने महाप्रसादको गभर्नरबाट घरफिर्तिसँगै सेयर बजारले नयाँ उचाई लिने प्रतिकृया दिएका छन् । अब आउने गभर्नर प्रजातान्त्रिक पार्टीबाट आउने भएको कारण जो सुकै आएपनि अबका वर्ष लगानीकर्ताहरुको लागि उत्कृष्ट वर्ष हुने उनीहरुको विश्वास छ।  

एक लगानीकर्ताले भने, ‘पूँजीबजारदेखि समग्र अर्थतन्त्र गभर्नरको व्यग्र प्रतिक्षामा रहेको छ । सरकार भने राष्ट्र बैंकबाट गभर्नर बिदा बसिसक्दा पनि मस्त निन्द्रामा र बिचौलियाको प्रभावमा परेको छ।’ ती लगानीकर्ताले थपे, ‘अहिलेसम्म सरकारले गभर्नर नियुक्ति गर्न नसक्नु भनेका अरु नियुक्ति जस्तै गभर्नरको नियुक्तिमा पनि सरकार बिचौलियाको प्रभावमा परेको हुन सक्छ ।’