लगानीकर्तामा जलविद्युतको चर्चा, भन्छन्, ‘आईपीओबाट ‘ढोका’ खुल्छ, कारोबार गर्न नजाने ‘धोका’ पनि हुन्छ’

काठमाण्डौ । साताको प्रत्येक आइतबार पस्कदै आईरहेको नियमित स्तम्भ ‘ग्राउण्ड जीरो’लाई आज पनि निरन्तरता दिएका छौं । ग्राउन्ड जिरोको क्रममा आज हामी त्रिपुरेश्वर, सुन्धारा र न्यूरोड आसपासका ब्रोकरहाउसहरुमा पुगेर लगानीकर्ताहरुको बिचार बुझ्ने प्रयास गरेका छौं  ।

सबैभन्दा पहिले हामी त्रिपुरेश्वमा रहेको इन्भेष्टमेन्ट म्यानेजमेन्ट नेपाल (स्टक ब्रोकर नम्बर ५३) मा पुग्यौं । यहाँ पूग्दा ब्रोकर हासउमा केही लगानीकर्ताहरु पुगिसकेका थिए । आज बिहान पहिलो प्रहरमा बजार राम्रै अंकले बढेको थियो । ‘लौ है साथीहरु ! अब त बजार बढ्ला जस्तो छ । सरकार पनि तत्कालै ढल्ने अवस्था छैन । देउबा फर्के पछि अब गर्भनरको बिषयले पनि टुङ्गो लाग्ने भन्ने सुनिएको छ । बजार त अब बढ्ने नै हो,’ एक लगानीकर्ताले भनेको सुनियो । उनको यस्तो अभिव्यक्ति सुनिसेकपछि अर्का एक लगानीकर्ता बोले,‘अन्तराष्ट्रिय अवस्था ठीक छैन । त्यसैले छोटो समयको लागि भन्दा पनि अलि लामो समयको लागि सेयर खरिद गर्दा ठीक होला साथीहरु । मैंले त सस्ता मूल्य भएका निफ्रा एचआइडीसीएल जस्ता कम्पनी किनेर राखेको छु ।’

ब्रोकर हाउसमा यस्तै गफगाफ चल्दै थिए । आज पहिलो प्रहरमा बजार २० अंक भन्दा बढीले बढेको थियो । आज मध्यान्हमा राजधानीमा छिटपुट वर्षा पनि भएको थियो भने बजारले कारोबार सहित गति लिएको देखिन्थ्यो । यहाँबाट हामी सुन्धारामा रहेको सुन्धारा सेक्यूरिटिज (स्टक ब्रोकर नम्बर ५२) मा पूग्यौं । यहाँ केही लगानीकर्ताहरु ब्रोकर हाउसमा भेला भएर राजनीतिक र सेयर बजारको विषयमा चर्चा गर्दै थिए । यतिकैमा एक जना लगानीकर्ताले अहिलेको सरकार ढल्ने भन्ने विषय त्यति विश्वासिलो नभएको बताए । ‘राप्रपा र रासपा नभएसम्म बैकल्पिक सरकार बन्दैन । उता भारत र पाकिस्तानबीचको बढ्दो तनावले भारतले नेपालमा ध्यान दिन पनि सकेको छैन । त्यसैले यो सरकार अहिले नै केही हुन्छ भन्ने त मलाई लाग्दैन’ ती लगानीकर्ताले भने ।

यसै ब्रोकरमा भेटिएका एक लगानीकर्ताले अहिले बजारमा खेलाडी लागेका कम्पनी मात्रै बढ्ने गरेको गुनासो गरे । उनले भने, ‘हाइड्रो कम्पनीमा सँस्थापक हकप्रदको फण्डा निकालेर बेचेर भाग्दै छन् । हाइड्रोमा पनि बैंकमा जस्तै लकिङ राख्नु पर्ने भयो ।’ यस्तै एक लगानीकर्ताले आफू भने बैंकको सेयर किनेर झनै फसेको गूनासो गर्दै थिए ।  

यस बेलासम्म दिनको एक बज्दै थियो । बजारमा बिस्तारै बिक्री दबाब आउदै थियो । यहाँबाट हामी न्यूरोडमा रहेको एबीसी सेक्यूरिटिज (स्टक ब्रोकर नँम्बर १७) तर्फ लाग्यौं । यहाँ पनि लगानीकर्ता बजार हेर्न मस्त देखिन्थे । यस ब्रोकर भेटिएका लगानीकर्ताले आज जलविद्युत कम्पनीहरुमा चमक आएकाले अब अन्य समूहमा पनि चमक आउने प्रतिक्रिया दिए ।

आज एक बजे पछि बजारमा केही बिक्री दबाब आएको थियो । यसै प्रति इङ्गित गर्दै एक लगानीकर्ता खेलाडीले  आज पहिलो प्रहरमा सेयर बेच्न बढाएको आँकलन गरे । तर उनी सँगै बसेका एक लगानीकर्ताले भने कारोबार त राम्रै बढेकाले बजार घट्नु नै पर्ने त केही कारण नभएको बताए ।  

ब्रोकर हाउसमा यस्तै गल्फति चल्दै थिए । यहाँबाट हामी नक्सालमा रहेको नासा सेक्यूरिटिज (स्टक ब्रोकर नम्बर ५८( मा पग्यौं । यहाँ केही आन्दोलनमा आएका शिक्षक लगानीकर्ता पनि भेटिए । त्यस्ता लगानीकर्ता मध्येका एकजनाले भने, ‘त्या आन्दोलन भन्दा त हामी पनि सेयर बजारमा नै लाग्नु पर्छ की के हो साथीहरु ?’ उनी सँगै बसेका लगानीकर्ताले उनलाई सुझाव दिदै भने, ‘बुझेर आउनुहोस् है यो बजारमा । आईपीओ भरेपछि सेयर बजारको ढोका खुल्छ । दोस्रो बजारमा त कारोबार गर्न नजाने ठूलै धोका पनि हुनसक्छ ।’ त्यसैले सबै विषय बुझेर मात्रै आउनुहोस् ।’  

ब्रोकर हाउसमा लगानीकर्ताबीच यस्तै वार्तालाप चल्दै थिए । २ बजे पछि भने बजारमा केही बिक्री दबाब देखिएको थियो ।